Ўзбекистон Республикаси Президентининг 08.02.2024 й. ПҚ-65-сон "Мактабгача ва умумий ўрта таълим соҳаси объектларини барпо этишда буюртмачи хизмати фаолиятини янада такомиллаштириш чора-тадбирлари тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

08.02.2024 й.

N ПҚ-65

МАКТАБГАЧА ВА УМУМИЙ ЎРТА

ТАЪЛИМ СОҲАСИ ОБЪЕКТЛАРИНИ

БАРПО ЭТИШДА БУЮРТМАЧИ ХИЗМАТИ

ФАОЛИЯТИНИ ЯНАДА ТАКОМИЛЛАШТИРИШ

ЧОРА-ТАДБИРЛАРИ ТЎҒРИСИДА

Мактабгача ва умумий ўрта таълим соҳасига ажратилган маблағлардан самарали фойдаланиш ва уларни иқтисод қилиш, келгусида мактабгача таълим ташкилотлари, умумтаълим ва ихтисослаштирилган мактабларни сақлаш харажатларини қисқартириш мақсадида:

1. Иқтисодиёт ва молия вазирлиги, Қурилиш ва уй-жой коммунал хўжалиги вазирлиги ҳамда Мактабгача ва мактаб таълими вазирлигининг:

Қурилиш ва уй-жой коммунал хўжалиги вазирлиги ҳузурида давлат муассасаси шаклида Инфратузилмани ривожлантириш инжиниринг компаниясини (кейинги ўринларда - Компания) ташкил этиш;

Ўзбекистон Республикаси Президентининг 2023 йил 25 декабрдаги ПҚ-404-сон қарори билан тасдиқланган 2024-2026 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури (кейинги ўринларда - Дастур) доирасида Компания мактабгача таълим ташкилотлари, умумтаълим ва ихтисослаштирилган мактабларни (кейинги ўринларда - объектлар) қуриш, реконструкция қилиш ва капитал таъмирлаш бўйича буюртмачи вазифасини бажариши;

Компанияга Дастур доирасида тасдиқланган лойиҳа-смета ҳужжатлари асосида объектлар учун марказлашган ҳолда асосий қурилиш материаллари, жиҳозлар ва конструкцияларни (қурилиш жараёни билан боғлиқ бўлмаган мебель жиҳозлари ва асбоб-ускуналар бундан мустасно) харид қилиш ҳуқуқини бериш тўғрисидаги таклифларига розилик берилсин.

2. Мактабгача таълим ташкилотлари, умумтаълим ва ихтисослаштирилган мактабларни қуриш ишларини мувофиқлаштириш бўйича республика штаби (кейинги ўринларда - Республика штаби) таркиби 1-иловага мувофиқ тасдиқлансин.

Қуйидагилар Республика штабининг асосий вазифалари этиб белгилансин:

ташкил этилаётган Компания фаолиятини йўлга қўйиш, молиялаштириш ва сақлаш, шу жумладан Компания зиммасига юкланган функцияларнинг ўз вақтида ва сифатли амалга оширилиши учун зарур шарт-шароитлар яратиш;

объектлар қурилишига ажратилаётган маблағлардан самарали фойдаланиш ҳамда ортиқча харажатларни қисқартириш орқали маблағларни иқтисод қилиш бўйича зарур чораларни кўриш;

Компания томонидан объектлар учун марказлашган ҳолда қурилиш материаллари, жиҳозлар ва конструкцияларни харид қилиш ҳамда ўз вақтида етказиб беришда юзага келадиган муаммоли масалаларни тезкор ҳал этиб бориш;

объектларда лойиҳалаштириш ва қурилиш-монтаж ишларини бажариш ҳажми ва муддатлари бўйича доимий равишда Компания ва масъулларнинг ҳисоботини эшитиб бориш;

Дастур доирасида иқтисод қилинган маблағлар ҳисобига янги ва қўшимча объектларни қуриб, фойдаланишга топшириш бўйича манзилли дастурни тасдиқлаш ва ижросини назорат қилиш;

объектлардаги қурилиш, реконструкция қилиш ва капитал таъмирлаш ишларининг ҳолатини ҳар ойда муҳокама қилиб бориш.

3. Шундай тартиб жорий этилсинки, унга мувофиқ:

а) Компания объектларни қуриш, реконструкция қилиш ва капитал таъмирлаш учун:

харидларни амалга ошириш доирасида маҳсулотлар ва хизматларни топиш ва баҳолаш, ишлаб чиқарувчи ва етказиб берувчилар билан музокаралар олиб бориш ҳамда маҳсулотлар сифатини пасайтирмаган ҳолда тежамкор битимлар тузилишини таъминлайди;

харид қилинган қурилиш материаллари, жиҳозлар ва конструкцияларни объектларга тўғридан-тўғри етказиб беради ҳамда пудратчиларга топширади;

б) Компания объектларнинг сифатини мунтазам назорат қилиб бориш мақсадида ҳудудлар кесимида ҳар бешта объектга камида битта техник назорат ходимини бириктиради;

в) Компанияга:

объектлар учун зарур бўлган қурилиш материаллари, жиҳозлар ва конструкциялар ишлаб чиқарувчилар таклифлари ўртача биржа нархларидан 20 фоиз арзон бўлган тақдирда, истисно тариқасида, тендер (танлов) савдоларини ўтказмасдан, энг яхши таклифлар орасидан танлаб олиш орқали товарларни тўғридан-тўғри харид қилиш;

асосланган ҳисоб-китобларга кўра объектлар учун зарур бўлган қурилиш материаллари, жиҳозлар ва конструкцияларни харид қилиш (етказиб бериш) учун олдиндан 30 фоиз аванс (бўнак) ажратиш;

ҳудудларда зарур инфратузилмага эга омборхоналар ташкил этиш учун тендер (танлов) савдоларини ўтказмасдан, энг яхши таклифлар орасидан танлаб олиш орқали тўғридан-тўғри ижара шартномаларини тузиш;

марказлашган ҳолда етказиб бериладиган қурилиш материаллари, жиҳозлар ва конструкциялардан ташқари, тасдиқланган лойиҳа-смета ҳужжатлари доирасида зарур қўшимча товарларни харид қилиш учун, кейинчалик уларнинг қийматини бажарилган ишлар учун ҳисоб-китоб қилиш шарти билан бош пудрат ташкилотларига тегишли маблағларни ажратиш;

маҳаллий ва хорижий бошқарувчи, маслаҳатчиларни (PMC - Project Management Consultancy) тендер (танлов) савдоларини ўтказмасдан, энг яхши таклифлар орасидан танлаб олиш ва тўғридан-тўғри шартнома тузиш орқали жалб қилиш ҳуқуқи берилади.

4. Белгилансинки:

а) Компаниянинг фаолиятини молиялаштириш, шу жумладан сақлаш, моддий-техника базасини мустаҳкамлаш ҳамда маҳаллий ва хорижий маслаҳатчиларни жалб қилиш харажатлари Дастур доирасида ажратилган маблағларнинг 1 фоиздан кам бўлмаган қисми ҳисобидан амалга оширилади;

б) Дастур доирасида аввалги йилларда бошланган йилдан-йилга ўтувчи объектлар бўйича буюртмачи функцияларини тегишлича Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари ҳузуридаги "Ягона буюртмачи хизмати" инжиниринг компаниялари бажаради;

в) объектлар бўйича минимал рейтинг талабларини тўғри белгилаш мақсадида уларнинг бошланғич қиймати Компания томонидан харид қилинадиган қурилиш материаллари, жиҳозлар ва конструкцияларнинг лойиҳа-смета ҳужжатларидаги қиймати билан бирга ҳисобланади;

г) объектларни қуриш, реконструкция қилиш ва капитал таъмирлаш бўйича пудрат ташкилотлари танлови учун "Шаффоф қурилиш" миллий ахборот тизимининг электрон тендер платформасида:

эълон шартларини белгилашда марказлашган тартибда харид қилинадиган қурилиш материаллари, жиҳозлар ва конструкциялар ҳажми ва қиймати Компаниянинг харажатларини инобатга олган ҳолда алоҳида қатор билан жойлаштирилади;

жойлаштирилган эълонларда объектларнинг бошланғич қийматидан Компания томонидан харид қилинадиган қурилиш материаллари, жиҳозлар ва конструкцияларнинг лойиҳа-смета ҳужжатларидаги қиймати айрилади. Бунда, бош пудратчининг тўғридан-тўғри харажатга ҳисобланган харажатлари суммаси тўлиқ сақланади;

д) объектлар ҳудудидаги муҳандислик-коммуникация тармоқларини кўчириш, шунингдек, ичимлик ва оқова сув таъминоти, электр, газ ва алоқа тармоқларини тортиб келиш тадбирлари тегишлилиги бўйича "Ўзсувтаъминот" АЖ, "Ҳудудий электр тармоқлари" АЖ, "Ҳудудгазтаъминот" АЖ ва "Ўзбектелеком" АК томонидан маҳаллий бюджетларда ушбу мақсадларга мўлжалланган маблағлар ҳамда уларнинг қўшимча манбалари ҳисобидан амалга оширилади.

5. Мактабгача таълим ташкилотлари, умумтаълим ва ихтисослаштирилган мактабларни лойиҳалаштириш, қурилиш-монтаж ва молиялаштириш ишларини самарали ташкил этиш бўйича чора-тадбирлар режаси 2-иловага мувофиқ тасдиқлансин.

6. Бош прокурор ўринбосари С.И. Самадов Дастур доирасида объектларни қуриш, реконструкция қилиш ва капитал таъмирлаш учун ажратилган маблағларнинг мақсадли сарфланиши устидан доимий назорат ўрнатсин.

7. Қурилиш ва уй-жой коммунал хўжалиги вазирлиги Иқтисодиёт ва молия вазирлиги, Адлия вазирлиги билан биргаликда 2024 йил якунига қадар объектларни қуриш бўйича ўтказилган тажриба-синов самарадорлиги таҳлили натижаларидан келиб чиқиб:

заруратга кўра мазкур амалиётни ижтимоий ва ишлаб чиқариш инфратузилмасини ривожлантириш дастурлари доирасида бошқа соҳа объектларига нисбатан жорий этиш;

бюджет маблағлари ҳисобидан молиялаштириладиган ижтимоий ва инфратузилма объектлари қурилишига оид қонунчилик ҳужжатларига тегишли ўзгартириш ва қўшимчалар киритиш юзасидан таклифларни Вазирлар Маҳкамасига киритсин.

8. Мазкур қарор ижросини самарали ташкил қилиш учун масъул ва шахсан жавобгар этиб қурилиш ва уй-жой коммунал хўжалиги вазири вазифасини вақтинча бажарувчи Ш.С. Ҳидоятов белгилансин.

Қарор ижросини муҳокама қилиб бориш, вазифалар ижросига масъул вазирликлар, идоралар ва маҳаллий ҳокимликлар фаолиятини мувофиқлаштириш ҳамда назорат қилиш Ўзбекистон Республикасининг Бош вазири А.Н. Арипов зиммасига юклансин.

Ўзбекистон Республикаси Президенти                                   Ш. Мирзиёев

Ўзбекистон Республикаси

Президентининг

2024 йил 8 февралдаги

ПҚ-65-сон қарорига

1-ИЛОВА

Мактабгача таълим ташкилотлари, умумтаълим

ва ихтисослаштирилган мактаблар қурилиши

ишларини мувофиқлаштириш бўйича

РЕСПУБЛИКА ШТАБИ ТАРКИБИ

Изоҳ: Республика штаби аъзолари бошқа ишга ўтган тақдирда, унинг таркибига ушбу лавозимга янгидан тайинланган ёки тегишли функцияларни бажариш зиммасига юкланган шахслар киритилади.

Ўзбекистон Республикаси

Президентининг

2024 йил 8 февралдаги

ПҚ-65-сон қарорига

2-ИЛОВА

Мактабгача таълим ташкилотлари,

умумтаълим ва ихтисослаштирилган мактабларни

лойиҳалаштириш, қурилиш-монтаж ва молиялаштириш

ишларини самарали ташкил этиш бўйича

ЧОРА-ТАДБИРЛАР РЕЖАСИ

Қонун ҳужжатлари маълумотлари миллий базаси (www.lex.uz),

2024 йил 10 февраль