Ўзбекистон Республикаси Вазирлар Маҳкамасининг 10.07.2024 й. 410-сон "Иссиқхона хўжаликларига хориждан малакали агроном, энтомолог ва лаборатория мутахассисларини жалб қилиш харажатларининг 50 фоизини қоплаш тартиби тўғрисидаги низомни тасдиқлаш ҳақида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

10.07.2024 й.

N 410

ИССИҚХОНА ХЎЖАЛИКЛАРИГА

ХОРИЖДАН МАЛАКАЛИ АГРОНОМ, ЭНТОМОЛОГ

ВА ЛАБОРАТОРИЯ МУТАХАССИСЛАРИНИ ЖАЛБ

ҚИЛИШ   ХАРАЖАТЛАРИНИНГ   50   ФОИЗИНИ

ҚОПЛАШ ТАРТИБИ ТЎҒРИСИДАГИ НИЗОМНИ

ТАСДИҚЛАШ ҲАҚИДА

Республикада иссиқхона хўжаликларини замонавий илмий ёндашувлар асосида ривожлантириш ва уларнинг фаолиятини самарали ташкил этиш учун қулай шароит яратиш, қишлоқ хўжалиги экинлари ҳосилдорлигини ошириш мақсадида, шунингдек, Вазирлар Маҳкамасининг "Иссиқхона хўжаликлари ва мева-сабзавотларни экспорт қилувчи корхоналарнинг фаолиятини қўллаб-қувватлашга доир қўшимча чора-тадбирлар тўғрисида" 2023 йил 27 октябрдаги 567-сон қарорига мувофиқ Вазирлар Маҳкамаси ҚАРОР ҚИЛАДИ:

1. Қуйидагиларни назарда тутувчи Иссиқхона хўжаликларига хориждан малакали агроном, энтомолог ва лаборатория мутахассисларини жалб қилиш харажатларининг 50 фоизини қоплаш тартиби тўғрисидаги низом иловага мувофиқ тасдиқлансин:

иссиқхона хўжаликларига хориждан жалб қилинадиган малакали агроном, энтомолог ва лаборатория мутахассислари рўйхатини шакллантириш ҳамда малакали агрономлар "яшил реестри"ни юритиш тартиби;

иссиқхона хўжаликларига хориждан малакали агроном, энтомолог ва лаборатория мутахассисларини жалб қилиш харажатларининг 50 фоизини қоплаш учун субсидия ажратиш бўйича талаб этиладиган ҳужжатлар, уларни кўриб чиқиш ҳамда субсидия ажратиш тўғрисидаги қарорни қабул қилиш тартиби;

иссиқхона хўжаликларига хориждан малакали агроном, энтомолог ва лаборатория мутахассисларини жалб қилиниши юзасидан мониторинг юритиш.

2. Инвестицияларни жалб қилиш, саноатни ривожлантириш ва савдони тартибга солиш масалалари бўйича Ҳукумат комиссияси (Ж. Ходжаев) (кейинги ўринларда - Ҳукумат комиссияси) бир ой муддатда 2024 йилда хориждан малакали агроном, энтомолог ва лаборатория мутахассисларини жалб қилиш харажатларининг 50 фоизи қоплаб бериладиган иссиқхоналарнинг манзилли рўйхатини тасдиқласин.

3. Ўзбекистон Республикаси Қишлоқ хўжалиги вазирлиги Ҳукумат комиссияси томонидан тасдиқланган рўйхатга мувофиқ "Agrosubsidiya" ахборот тизимига киритилган иссиқхона хўжаликларига ўз вақтида субсидия ажратилишини назорат қилиб борсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Ж.А. Қўчқоров ва Ж.А. Ходжаев зиммасига юклансин.

Ўзбекистон Республикасининг Бош вазири                          А. Арипов

Қонун ҳужжатлари маълумотлари миллий базаси (www.lex.uz),

2024 йил 13 июль