Ўзбекистон Республикаси Вазирлар Маҳкамасининг 17.07.2024 й. 432-сон "Кичик саноат зоналари ҳамда ёшлар саноат ва тадбиркорлик зоналари тадбиркорларини қўллаб-қувватлаш бўйича қўшимча чора-тадбирлар тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

17.07.2024 й.

N 432

КИЧИК САНОАТ ЗОНАЛАРИ ҲАМДА

ЁШЛАР САНОАТ ВА ТАДБИРКОРЛИК ЗОНАЛАРИ

ТАДБИРКОРЛАРИНИ ҚЎЛЛАБ-ҚУВВАТЛАШ БЎЙИЧА

ҚЎШИМЧА ЧОРА-ТАДБИРЛАР ТЎҒРИСИДА

Ўзбекистон Республикаси Президентининг "Махсус иқтисодий, кичик саноат, ёшлар саноат ва тадбиркорлик зоналари фаолияти самарадорлигини оширишнинг қўшимча чора-тадбирлари тўғрисида" 2022 йил 13 июндаги ПФ-153-сон Фармони ва "Ўзбекистон Республикаси Президентининг тадбиркорлар билан 2023 йилдаги очиқ мулоқотида белгиланган вазифаларни амалга ошириш чора-тадбирлари тўғрисида" 2023 йил 4 сентябрдаги ПҚ-292-сон қарори ижросини таъминлаш, шунингдек, кичик саноат зоналари ҳамда ёшлар саноат ва тадбиркорлик зоналарида фаолият юритаётган тадбиркорлик субъектларининг ҳуқуқларини кенгайтириш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Ҳукуматининг 1-иловага мувофиқ айрим қарорларига қуйидагиларни назарда тутувчи ўзгартириш ва қўшимчалар киритилсин:

кичик саноат зоналари иштирокчилари ҳамда ёшлар саноат ва тадбиркорлик зоналари ёш тадбиркорлик субъектларининг инвестиция ва ижтимоий мажбуриятларининг бажарилишини қабул қилиш механизмлари;

инвестиция ва ижтимоий мажбуриятларни тўлиқ бажарган кичик саноат зоналари иштирокчилари, ёшлар саноат ва тадбиркорлик зоналари ёш тадбиркорлик субъектларига берилган давлат кўчмас мулк объектлари ҳамда ер участкаларини хусусийлаштириш тартиби;

Давлат активларини бошқариш агентлигига кичик саноат зоналари, ёшлар саноат ва тадбиркорлик зоналарида жойлашган давлат мулки объектларини хусусийлаштириш ваколатини бериш.

2. Шундай тартиб ўрнатилсинки, унга кўра 2024 йил 1 августдан бошлаб кичик саноат зоналари иштирокчилари, ёшлар саноат ва тадбиркорлик зоналари ёш тадбиркорлик субъектларининг инвестиция ва ижтимоий мажбуриятлари бажарилганлиги Қорақалпоғистон Республикаси Вазирлар Кенгаши ҳамда вилоятлар ҳокимликлари ҳузуридаги Кичик ва ёшлар саноат зоналарини бошқариш бўйича ягона дирекциялар томонидан мажбуриятларни бажариш муддати тугагандан сўнг уч ой ичида қабул қилинади, амалга ошириш муддати 2024 йил 1 августга қадар тугаган лойиҳалар бундан мустасно.

3. Инвестициялар, саноат ва савдо вазирлиги:

Савдо-саноат палатаси, Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда 2024 йил 1 сентябрга қадар кичик саноат зоналари, ёшлар саноат ва тадбиркорлик зоналари ҳудудида фаолият кўрсатаётган тадбиркорларнинг муаммоларини ўрганиб, уларни бартараф этиш бўйича Вазирлар Маҳкамасига таклиф киритсин;

2024 йил 1 октябрга қадар кичик саноат зоналари иштирокчилари ҳамда ёшлар саноат ва тадбиркорлик зоналари ёш тадбиркорлик субъектларининг инвестиция ва ижтимоий мажбуриятларининг бажарилганлиги ёки бажарилмаганлигини хатловдан ўтказиб, уларнинг ҳисобини юритиш бўйича алоҳида электрон дастурни ишга туширсин ва ҳар чоракда маълумотларни янгилаб борсин.

4. Тошкент шаҳрида жойлашган кичик саноат зоналари, ёшлар саноат ва тадбиркорлик зоналарида инвестиция ва ижтимоий мажбуриятларнинг бажарилишини қабул қилиш ҳамда давлат кўчмас мулк объектларини хусусийлаштириш масалалари бўйича 2-иловага мувофиқ таркибда Ҳукумат комиссияси (кейинги ўринларда - Ҳукумат комиссияси) тузилсин.

Қуйидагилар Ҳукумат комиссиясининг вазифалари этиб белгилансин:

Тошкент шаҳрида жойлашган кичик саноат, ёшлар саноат ва тадбиркорлик зоналари ҳудудидаги ер участкаларини хусусийлаштириш масалаларини шаҳарнинг ишлаб чиқилаётган бош режасига мувофиқлигини ўрганган ҳолда кўриб чиқиш;

кичик саноат зоналари иштирокчилари, ёшлар саноат ва тадбиркорлик зоналари ёш тадбиркорлик субъектларининг инвестиция ва ижтимоий мажбуриятларининг бажарилишини қабул қилиш;

инвестиция ва ижтимоий мажбуриятларни тўлиқ бажарган иштирокчиларга берилган давлат кўчмас мулк объектларини хусусийлаштириш тўғрисида қарор қабул қилиш.

5. Ҳукумат комиссияси (Ш. Умурзаков) икки ой муддатда Тошкент шаҳридаги кичик саноат зоналари иштирокчилари, ёшлар саноат ва тадбиркорлик зоналари ёш тадбиркорлик субъектларининг мажбуриятлари бажарилишини қабул қилишни ташкил этиш юзасидан таклифлар киритсин.

6. Қурилиш ва уй-жой коммунал хўжалиги вазирлиги кичик саноат зоналари, ёшлар саноат ва тадбиркорлик зоналари ҳудудида шаҳарсозлик фаолияти уларнинг бош режасига мувофиқ амалга оширилиши ҳамда ажратилган ер участкаларидан бошқа мақсадларда, шу жумладан, турар жой биноларини қуриш учун фойдаланилмаслиги устидан қатъий назорат ўрнатсин.

7. Давлат активларини бошқариш агентлиги икки ой муддатда кичик саноат зоналари, ёшлар саноат ва тадбиркорлик зоналари ҳудудида жойлашган ва тадбиркорларга берилган ҳамда инвестиция битимлари ёки шартномаларда хусусийлаштирилиши кўрсатилмаган давлат кўчмас мулк объектларини инвестиция ва ижтимоий мажбуриятларни тўлиқ бажарган иштирокчиларга хусусийлаштириб бериш бўйича тегишли қонун лойиҳасини Вазирлар Маҳкамасига киритсин.

8. Мазкур қарорнинг бажарилишини назорат қилиш Ўзбекистон Республикаси инвестициялар, саноат ва савдо вазири Л.Ш. Қудратов ҳамда Давлат активларини бошқариш агентлиги директори А.Ж. Ортиқов зиммасига юклансин.

Ўзбекистон Республикасининг Бош вазири                                    А. Арипов

Вазирлар Маҳкамасининг

2024 йил 17 июлдаги

432-сон қарорига

1-ИЛОВА

Ўзбекистон Республикаси Ҳукуматининг

айрим қарорларига киритилаётган

ўзгартириш ва қўшимчалар

1. Вазирлар Маҳкамасининг 2020 йил 9 мартдаги 134-сон қарори билан тасдиқланган Кичик саноат зоналари тўғрисидаги низомда:

а) 2-банд қуйидаги мазмундаги йигирманчи хатбоши билан тўлдирилсин:

"КСЗ иштирокчисининг ўз маблағлари - КСЗ иштирокчисининг маблағлари, шу жумладан, ҳисобварағидаги маблағлар, кредит маблағлари ва қонунчиликда тақиқланмаган бошқа манбалар ҳисобидан амалга ошириладиган маблағлар";

б) 45-банд қуйидаги таҳрирда баён этилсин:

"45. Дирекциянинг тегишли қарори қабул қилиниши КСЗ иштирокчилари томонидан инвестиция лойиҳасини амалга ошириш тўғрисидаги битимда назарда тутилган муддатлар тугагандан сўнг ўзлари қабул қилган барча ижтимоий ва инвестиция мажбуриятлари бажарилганининг тасдиғи ҳисобланади.

Бунда киритилган инвестициялар миқдори КСЗ иштирокчиси томонидан жалб этиладиган ташкилотларнинг назорат ўлчови ва аудиторлик ташкилотининг ҳисоботи асосида аниқланади.

Ижтимоий мажбуриятлар бажарилиши (мавжуд бўлганда) КСЗ иштирокчиси томонидан тақдим этиладиган маълумотлар, меҳнат, солиқ ва бошқа органлардан олинадиган маълумот орқали аниқланади";

в) 5-боб қуйидаги мазмундаги 45-1 ва 45-2-бандлар билан тўлдирилсин:

"45-1. Дирекция заруратга кўра, инвестициявий ва ижтимоий мажбуриятлар бажарилишини қабул қилиш бўйича комиссия ташкил этиши мумкин.

45-2. Дирекция қуйидаги асосларга кўра инвестиция ва ижтимоий мажбуриятлар бажарилишини қабул қилишни рад этиш тўғрисида қарор қабул қилади:

КСЗ иштирокчиси томонидан инвестиция ва ижтимоий мажбуриятлар тўлиқ бажарилмаганда;

КСЗ иштирокчиси ўз фаолиятини лойиҳада кўрсатилган қувватда амалга оширмаганда ёки инвестиция лойиҳасини амалга ошириш тўғрисидаги битимда назарда тутилган фаолиятни амалга оширмаганда;

КСЗ иштирокчисига мазкур Низомга мувофиқ ер участкалари ҳамда давлат кўчмас мулк объектлари (уларнинг бир қисми) ажратиб берилмаганда.

КСЗ иштирокчиси Дирекциянинг инвестиция ва ижтимоий мажбуриятлар бажарилишини қабул қилишни рад этиш тўғрисидаги қарори устидан белгиланган тартибда судга мурожаат этишга ҳақли".

г) 7-боб қуйидаги мазмундаги 64-1 - 64-8-бандлар билан тўлдирилсин:

"64-1. КСЗ ҳудудидаги давлат кўчмас мулк объектлари (уларнинг бир қисми) мазкур Низомга 5-иловадаги схемага мувофиқ хусусийлаштирилади.

Инвестиция ва ижтимоий мажбуриятларни бажарган КСЗ иштирокчиси давлат кўчмас мулк объектларини (уларнинг бир қисмини) хусусийлаштириш учун қуйидаги ҳужжатларни илова қилган ҳолда Дирекцияга ариза билан мурожаат қилади:

инвестиция лойиҳасини амалга ошириш тўғрисидаги битимга асосан давлат кўчмас мулк объектлари (уларнинг бир қисми) қабул қилинган кундан бошлаб хусусийлаштиришга ариза берилган даврда КСЗ иштирокчиси томонидан ўз маблағлари ҳисобидан реконструкция қилинган ёки капитал таъмирланган давлат кўчмас мулк объектлари (уларнинг бир қисми) бўйича назорат ўлчови ҳамда КСЗ иштирокчиси мақомини олганига камида уч йил бўлганини тасдиқловчи ҳужжат;

КСЗ иштирокчиси мақомини олганига камида беш йил бўлганини тасдиқловчи ҳужжат ва давлат кўчмас мулк объектларига (уларнинг бир қисмига) КСЗ иштирокчиси томонидан Дирекция билан келишилган ҳолда уларга қилинган харажатлар бўйича назорат ўлчови.

64-2. Дирекция беш иш куни ичида давлат кўчмас мулк объектларини (уларнинг бир қисмини) хусусийлаштириш бўйича тегишли ҳужжатларни (инвестиция ва ижтимоий мажбуриятларни бажарилганлиги тўғрисида Дирекция қарори, кадастр ҳужжати, назорат ўлчови, КСЗ иштирокчисига ижара ҳақидан чегирма берилганлиги тўғрисидаги маълумот) илова қилган ҳолда, Давлат активларини бошқариш агентлигининг ҳудудий бошқармасига тақдим этади.

64-3. Давлат активларини бошқариш агентлигининг ҳудудий бошқармаси мазкур Низомнинг 64-2-бандида назарда тутилган ҳужжатлар тўлиқ тақдим этилмаган тақдирда, хулоса келиб тушган пайтдан бошлаб уч иш куни ичида камчиликларни бартараф этиш учун ҳужжатларни Дирекцияга қайтаради.

64-4 Давлат активларини бошқариш агентлигининг ҳудудий бошқармаси:

Вазирлар Маҳкамасининг 2014 йил 6 октябрдаги 279-сон қарори билан тасдиқланган Давлат кўчмас мулк объектларини сотиш тартиби тўғрисидаги низомга асосан бухгалтерия ҳисоби миллий стандартларига мувофиқ беш иш куни ичида давлат кўчмас мулки объектини хатловдан ўтказиш тўғрисида балансда сақловчига ёзма талабнома юборади;

балансда сақловчи томонидан тақдим этилган материаллар ва ҳужжатлар кўриб чиқилгандан етти кун муддатда баҳоловчи ташкилотни белгиланган тартибда жалб этади. Бунда баҳоловчи ташкилотни жалб этиш учун ишлаб чиқилган техник шартда ўн кун муддатда баҳоловчи ташкилот томонидан давлат кўчмас мулк объектини баҳолаш тўғрисидаги ҳисобот ва ушбу ҳисоботнинг ишончлилигини экспертизадан ўтказиш натижалари тўғрисидаги эксперт хулосасида объектнинг бугунги кундаги баҳоланган қиймати ва КСЗ иштирокчиси томонидан давлат кўчмас мулк объектларига (уларнинг бир қисмига) сарфланган харажатлар чегирилган ҳолдаги қиймати, шунингдек, бинога сарфланган харажатларни чегиришда, аввал мазкур КСЗ иштирокчисига ижара ҳақи юзасидан берилган чегирмалар инобатга олиниши лозимлиги кўрсатилади;

белгиланган тартибда баҳоловчи ташкилот жалб этилгандан сўнг унга мазкур Низомнинг 64-2-бандида назарда тутилган ҳужжатларни ҳамда балансда сақловчининг раҳбари томонидан имзоланган тегишли хатловдан ўтказиш далолатномалари, маданий мерос, фуқаро муҳофазаси объектлари ва сервитут мавжудлиги ҳамда КСЗ иштирокчисига ижара ҳақидан чегирма берилганлиги тўғрисидаги маълумотларни тақдим этади.

64-5. Давлат кўчмас мулк объектининг баҳоси баҳоловчи ташкилот томонидан аниқлангандан кейин Давлат активларини бошқариш агентлигининг ҳудудий бошқармаси бир иш куни ичида КСЗ иштирокчисига давлат кўчмас мулк объектини баҳоланган қийматда сотиб олиш бўйича ёзма таклиф (шахсан тилхат орқали ёки почтада топширилганлиги маълум қилинадиган буюртма хат орқали) тақдим этади.

Бунда КСЗ иштирокчиси томонидан баҳолаш тўғрисидаги ҳисоботнинг ишончлилигини экспертизадан ўтказиш натижалари тўғрисида эксперт хулосаси олиниши мумкин.

КСЗ иштирокчисининг давлат кўчмас мулк объектини сотиб олиш юзасидан розилиги олинган тақдирда, ўн иш куни ичида давлат кўчмас мулк объектини КСЗ иштирокчиси билан тўғридан-тўғри олди-сотди шартномаси тузиш орқали сотади.

Бунда КСЗ иштирокчиси давлат кўчмас мулк объектини сотиб олишни рад этган ёки бир ой муддатда муносабат билдирмаган тақдирда, давлат мулкини ижарага олиш бўйича шартномада белгиланган муддатда фаолиятини амалга оширишга, шунингдек, ижарага олиш шартномаси бўйича муддат якунланганда, Ўзбекистон Республикасининг Фуқаролик кодексига асосан шартномани қайта расмийлаштиришга ҳақлидир.

Тарафларнинг ўзаро келишувига эришиш имконияти бўлмаган тақдирда, Ўзбекистон Республикаси қонунчилигига мувофиқ Ўзбекистон Республикаси судларида кўриб чиқилади.

Тарафлар судларга мурожаат қилишдан аввал келишмовчиликларни музокаралар йўли билан ҳал қилиш учун барча зарур чораларни кўриш мажбуриятини ўз зиммаларига оладилар.

64-6. Давлат кўчмас мулк объектларини сотиб олиш учун тўловларни амалга ошириш муддати олди-сотди шартномаси кучга кирган кундан бошлаб беш йил ичида тенг улушларда тўланиши мумкин.

Бунда тўловнинг 35 фоизи бир ой ичида тўланиши лозим, агар тўланмаган тақдирда, Марказий банкнинг асосий ставкаси бўйича фоизлар ҳисобланади.

Давлат активларини бошқариш агентлигининг ҳудудий бошқармаси сотилган давлат кўчмас мулк объекти бўйича тўловлар ва пеня (юзага келган тақдирда) тўлиқ ҳажмда қопланган кундан бошлаб беш иш куни ичида КСЗ иштирокчисига мулк ҳуқуқини тасдиқловчи давлат ордерини беради.

64-7. Ўзбекистон Республикасининг "Қишлоқ хўжалигига мўлжалланмаган ер участкаларини хусусийлаштириш тўғрисида"ги Қонуни доирасида КСЗ ҳудудидаги ер участкалари Вазирлар Маҳкамасининг 2022 йил 14 февралдаги 71-сон қарори билан тасдиқланган Ўзбекистон Республикаси фуқаролари ва юридик шахсларига доимий фойдаланиш (эгалик қилиш), ижара ва мерос қилиб қолдириладиган умрбод эгалик қилиш ҳуқуқи асосида тегишли бўлган ер участкаларини хусусийлаштириш бўйича давлат хизматлари кўрсатишга доир маъмурий регламент талаблари асосида хусусийлаштирилади.

64-8. КСЗ ҳудудида жойлашган ва КСЗ иштирокчиларига берилган ҳамда инвестиция битимлари ёки шартномаларда хусусийлаштирилиши кўрсатилмаган давлат кўчмас мулк объектлари инвестиция ва ижтимоий мажбуриятларни тўлиқ бажарган иштирокчиларга қонунга мувофиқ хусусийлаштириб берилади";

д) қуйидаги мазмундаги 5-илова билан тўлдирилсин:

"Кичик саноат зоналари

тўғрисидаги низомга

5-ИЛОВА

Кичик саноат зонаси ҳудудидаги давлат кўчмас

мулк объектларини (уларнинг бир қисмини)

хусусийлаштириш

СХEМАСИ

           

".

      

2. Вазирлар Маҳкамасининг 2021 йил 10 майдаги 294-сон қарори билан тасдиқланган Ёшлар саноат ва тадбиркорлик зонаси тўғрисидаги низомда:

а) 2-банд қуйидаги мазмундаги тўртинчи хатбоши билан тўлдирилсин:

"Ёшлар саноат зоналари ёш тадбиркорлик субъектининг ўз маблағлари - Ёшлар саноат зоналари ёш тадбиркорлик субъектининг маблағлари, шу жумладан, ҳисобварағидаги маблағлар, кредит маблағлари ва қонунчиликда тақиқланмаган бошқа манбалар ҳисобидан амалга ошириладиган маблағлар";

б) 5-боб қуйидаги мазмундаги 25-1 - 25-11-бандлар билан тўлдирилсин:

"25-1. Ягона дирекциянинг тегишли қарорининг қабул қилиниши Ёшлар саноат зоналари ёш тадбиркорлик субъектлари томонидан инвестиция лойиҳасини амалга ошириш тўғрисидаги битимда назарда тутилган муддатлар тугагандан сўнг ўзлари қабул қилган барча инвестиция мажбуриятлари бажарилганининг тасдиғи ҳисобланади.

Бунда киритилган инвестициялар миқдори Ёшлар саноат зоналари ёш тадбиркорлик субъекти томонидан жалб этиладиган ташкилотларнинг назорат ўлчови ва аудиторлик ташкилотининг ҳисоботи асосида аниқланади.

25-2. Ягона дирекция заруратга кўра, инвестиция мажбуриятлари бажарилишини қабул қилиш бўйича комиссия ташкил этиши мумкин.

25-3. Ягона дирекция қуйидаги асосларга кўра инвестиция мажбуриятлари бажарилишини қабул қилишни рад этиш тўғрисида қарор қабул қилади:

Ёшлар саноат зоналари ёш тадбиркорлик субъекти томонидан инвестиция мажбуриятлари тўлиқ бажарилмаганда;

Ёшлар саноат зоналари ёш тадбиркорлик субъекти ўз фаолиятини лойиҳада кўрсатилган қувватда амалга оширмаганда ёки инвестиция лойиҳасини амалга ошириш тўғрисидаги битимда назарда тутилган фаолиятни амалга оширмаганда;

Ёшлар саноат зоналари ёш тадбиркорлик субъектига мазкур Низомга мувофиқ ер участкалари ҳамда давлат кўчмас мулк объектлари (уларнинг бир қисми) ажратиб берилмаганда.

Ёшлар саноат зоналари ёш тадбиркорлик субъекти Ягона дирекциянинг инвестиция мажбуриятлари бажарилишини рад этиш тўғрисидаги қарори устидан белгиланган тартибда судга мурожаат этишга ҳақли.

25-4. Ёшлар саноат зоналари ҳудудидаги давлат кўчмас мулк объектлари (уларнинг бир қисми) мазкур Низомга 4-иловадаги схемага мувофиқ хусусийлаштирилади.

Инвестиция мажбуриятларини бажарган Ёшлар саноат зоналари ёш тадбиркорлик субъекти давлат кўчмас мулк объектларини (уларнинг бир қисмини) хусусийлаштириш учун қуйидаги ҳужжатларни илова қилган ҳолда Ягона дирекцияга ариза билан мурожаат қилади:

инвестиция лойиҳасини амалга ошириш тўғрисидаги битимга асосан давлат кўчмас мулк объектлари (уларнинг бир қисми) қабул қилинган кундан бошлаб хусусийлаштиришга ариза берилган даврда Ёшлар саноат зоналари ёш тадбиркорлик субъекти томонидан ўз маблағлари ҳисобидан реконструкция қилинган ёки капитал таъмирланган давлат кўчмас мулк объектлари (уларнинг бир қисми) бўйича назорат ўлчови ҳамда Ёшлар саноат ёш тадбиркорлик субъекти мақомини олганига камида уч йил бўлганини тасдиқловчи ҳужжат;

Ёшлар саноат зоналари ёш тадбиркорлик субъекти мақомини олганига камида беш йил бўлганини тасдиқловчи ҳужжат ва давлат кўчмас мулк объектларига (уларнинг бир қисмига) Ёшлар саноат зоналари ёш тадбиркорлик субъекти томонидан Ягона дирекция билан келишилган ҳолда уларга қилинган харажатлар бўйича назорат ўлчови.

25-5. Ягона дирекция беш иш куни ичида давлат кўчмас мулк объектларини (уларнинг бир қисмини) хусусийлаштириш бўйича тегишли ҳужжатларни (инвестиция ва ижтимоий мажбуриятларни бажарилганлиги тўғрисида Ягона дирекция қарори, кадастр ҳужжати, назорат ўлчови, Ёшлар саноат зоналари ёш тадбиркорлик субъектига ижара ҳақидан чегирма берилганлиги тўғрисидаги маълумот) илова қилган ҳолда, Давлат активларини бошқариш агентлигининг ҳудудий бошқармасига тақдим этади.

25-6. Давлат активларини бошқариш агентлигининг ҳудудий бошқармаси мазкур Низомнинг 25-5-бандида назарда тутилган ҳужжатлар тўлиқ тақдим этилмаган тақдирда, хулоса келиб тушган пайтдан бошлаб уч иш куни ичида камчиликларни бартараф этиш учун ҳужжатларни Ягона дирекцияга қайтаради.

25-7. Давлат активларини бошқариш агентлигининг ҳудудий бошқармаси:

Вазирлар Маҳкамасининг 2014 йил 6 октябрдаги 279-сон қарори билан тасдиқланган Давлат кўчмас мулк объектларини сотиш тартиби тўғрисидаги низомга асосан бухгалтерия ҳисоби миллий стандартларига мувофиқ беш иш куни ичида давлат кўчмас мулки объектини хатловдан ўтказиш тўғрисида балансда сақловчига ёзма талабнома юборади;

балансда сақловчи томонидан тақдим этилган материаллар ва ҳужжатлар кўриб чиқилгандан етти кун муддатда баҳоловчи ташкилотни белгиланган тартибда жалб этади. Бунда баҳоловчи ташкилотни жалб этиш учун ишлаб чиқилган техник шартда ўн кун муддатда баҳоловчи ташкилот томонидан давлат кўчмас мулк объектини баҳолаш тўғрисидаги ҳисобот ва ушбу ҳисоботнинг ишончлилигини экспертизадан ўтказиш натижалари ҳақидаги эксперт хулосасида объектнинг бугунги кундаги баҳоланган қиймати ва Ёшлар саноат зоналари ёш тадбиркорлик субъекти томонидан давлат кўчмас мулк объектларига (уларнинг бир қисмига) сарфланган харажатлари чегирилган ҳолдаги қиймати, шунингдек, бинога сарфланган харажатларни чегиришда, аввал мазкур Ёшлар саноат зоналари ёш тадбиркорлик субъектига ижара ҳақи юзасидан берилган чегирмалар инобатга олиниши лозимлиги кўрсатилади;

белгиланган тартибда баҳоловчи ташкилот жалб этилгандан сўнг унга мазкур Низомнинг 25-5-бандида назарда тутилган ҳужжатларни ҳамда балансда сақловчининг раҳбари томонидан имзоланган тегишли хатловдан ўтказиш далолатномалари, маданий мерос, фуқаро муҳофазаси объектлари ва сервитут мавжудлиги ҳамда Ёшлар саноат зоналари ёш тадбиркорлик субъектига ижара ҳақидан чегирма берилганлиги тўғрисидаги маълумотларни тақдим этади.

25-8. Давлат кўчмас мулк объектининг баҳоси баҳоловчи ташкилот томонидан аниқлангандан кейин Давлат активларини бошқариш агентлигининг ҳудудий бошқармаси бир иш куни ичида Ёшлар саноат зоналари ёш тадбиркорлик субъектига давлат кўчмас мулк объектини баҳоланган қийматда сотиб олиш бўйича ёзма таклиф (шахсан тилхат орқали ёки почтадан топширилганлиги маълум қилинадиган буюртма хат орқали) тақдим этади.

Бунда ёш тадбиркорлик субъекти томонидан баҳолаш тўғрисидаги ҳисоботнинг ишончлилигини экспертизадан ўтказиш натижалари ҳақида эксперт хулосаси олиниши мумкин.

Ёшлар саноат зоналари ёш тадбиркорлик субъектининг давлат кўчмас мулк объектини сотиб олиш юзасидан розилиги олинган тақдирда, ўн иш куни ичида давлат кўчмас мулк объектини Ёшлар саноат зоналари ёш тадбиркорлик субъекти билан тўғридан-тўғри олди-сотди шартномаси тузиш орқали сотади.

Бунда Ёшлар саноат зоналари ёш тадбиркорлик субъекти давлат кўчмас мулк объектини сотиб олишни рад этган ёки бир ой муддатда муносабат билдирмаган тақдирда, давлат мулкини ижарага олиш бўйича шартномада белгиланган муддатда фаолиятини амалга оширишга, шунингдек, ижарага олиш шартномаси бўйича муддат якунланганда, Ўзбекистон Республикасининг Фуқаролик кодексига асосан қайта шартнома расмийлаштиришга ҳақлидир.

Тарафларнинг ўзаро келишувига эришиш имконияти бўлмаган тақдирда, Ўзбекистон Республикаси қонунчилигига мувофиқ Ўзбекистон Республикаси судларида кўриб чиқилади.

Тарафлар судларга мурожаат қилишдан аввал келишмовчиликларни музокаралар йўли билан ҳал қилиш учун барча зарур чораларни кўриш мажбуриятини ўз зиммаларига оладилар.

25-9. Давлат кўчмас мулк объектларини сотиб олиш учун тўловларни амалга ошириш муддати олди-сотди шартномаси кучга кирган кундан бошлаб беш йил ичида тенг улушларда тўланиши мумкин.

Бунда тўловнинг 35 фоизи бир ой ичида тўланиши лозим, агар тўланмаган тақдирда, Марказий банкнинг асосий ставкаси бўйича фоизлар ҳисобланади.

Давлат активларини бошқариш агентлигининг ҳудудий бошқармаси сотилган давлат кўчмас мулк объекти бўйича тўловлар ва пеня (юзага келган тақдирда) тўлиқ ҳажмда қопланган кундан бошлаб беш иш куни ичида Ёшлар саноат зоналари ёш тадбиркорлик субъектига мулк ҳуқуқини тасдиқловчи давлат ордерини беради.

25-10. Ўзбекистон Республикасининг "Қишлоқ хўжалигига мўлжалланмаган ер участкаларини хусусийлаштириш тўғрисида"ги Қонуни доирасида Ёшлар саноат зоналари ҳудудидаги ер участкалари Вазирлар Маҳкамасининг 2022 йил 14 февралдаги 71-сон қарори билан тасдиқланган Ўзбекистон Республикаси фуқаролари ва юридик шахсларига доимий фойдаланиш (эгалик қилиш), ижара ва мерос қилиб қолдириладиган умрбод эгалик қилиш ҳуқуқи асосида тегишли бўлган ер участкаларини хусусийлаштириш бўйича давлат хизматлари кўрсатишга доир маъмурий регламент талаблари асосида хусусийлаштирилади.

25-11. Ёшлар саноат зоналари ҳудудида жойлашган ва тадбиркорларга берилган ҳамда инвестиция битимлари ёки шартномаларда хусусийлаштирилиши кўрсатилмаган давлат кўчмас мулк объектлари инвестиция ва ижтимоий мажбуриятларни тўлиқ бажарган иштирокчиларга қонунга мувофиқ хусусийлаштириб берилади";

в) қуйидаги мазмундаги 4-илова билан тўлдирилсин:

"Ёшлар саноат ва тадбиркорлик

зоналари тўғрисидаги низомга

4-ИЛОВА

Ёшлар саноат ва тадбиркорлик зоналари

ҳудудидаги давлат кўчмас мулк объектларини

(уларнинг бир қисмини) хусусийлаштириш

СХEМАСИ

         

".

       

3. Вазирлар Маҳкамасининг 2022 йил 14 февралдаги 71-сон қарори билан тасдиқланган Ўзбекистон Республикаси фуқаролари ва юридик шахсларига доимий фойдаланиш (эгалик қилиш), ижара ва мерос қилиб қолдириладиган умрбод эгалик қилиш ҳуқуқи асосида тегишли бўлган ер участкаларини хусусийлаштириш бўйича давлат хизматлари кўрсатишга доир маъмурий регламентда:

а) 5-банд ўз кучини йўқотган деб ҳисоблансин;

б) 12-банд қуйидаги таҳрирда баён этилсин:

"12. Ўзи келиб мурожаат этганда, Давлат хизматлари марказлари ариза тўлдирилган вақтдан бошлаб реал вақт режимида уни "Yerхususiylashtirish" ААТ орқали туман (шаҳар) қурилиш бўлими ҳамда Кадастр агентлигининг Давлат кадастрлари палатаси (кейинги ўринларда - Давлат кадастрлари палатаси) туман (шаҳар) филиалига, шунингдек, кичик саноат зонаси (кейинги ўринларда - КСЗ) ва ёшлар саноат ва тадбиркорлик зоналари (кейинги ўринларда - Ёшлар саноат зоналари) ҳудудидаги ер участкалари бўлган тақдирда, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги Кичик ва ёшлар саноат зоналарини бошқариш бўйича ягона дирекцияга (кейинги ўринларда - Дирекция) келишиш учун юборади.

ЯИДХП орқали мурожаат қилинганда, ариза автоматик равишда "Yerхususiylashtirish" ААТ орқали туман (шаҳар) қурилиш бўлими ва Давлат кадастрлари палатаси туман (шаҳар) филиалига, шунингдек, КСЗ ва Ёшлар саноат зоналари ҳудудидаги ер участкалари бўлган тақдирда, Дирекцияга келишиш учун юборилади.

Бунда Дирекция бир иш куни ичида КСЗ иштирокчиси ва Ёшлар саноат зоналари ёш тадбиркорлик субъекти томонидан ер участкаси негизида шартномада белгиланган инвестиция ва ижтимоий мажбуриятлар бажарилганлиги ёки бажарилмаганлиги ҳамда лойиҳада кўрсатилган қувватда фаолият кўрсатилаётганлиги тўғрисида хулоса тақдим этади.

Хулосада кичик саноат, ёшлар саноат ва тадбиркорлик зоналари ҳудудидаги ер участкалари улардан фойдаланиш мақсадига кўра саноат зоналарининг бош режаси, улар жойлашган аҳоли пунктларининг тасдиқланган бош режалари, аҳоли пункти қисмларини батафсил режалаштириш лойиҳалари, ҳудудларни комплекс ривожлантириш ва қуришга доир бошқа ҳужжатларидан келиб чиқиб, ер участкасини хусусийлаштириш мумкинлиги ёки мумкин эмаслиги тўғрисида маълумот кўрсатилади".

         

           

Вазирлар Маҳкамасининг

2024 йил 17 июлдаги

432-сон қарорига

2-ИЛОВА

Тошкент шаҳрида жойлашган кичик саноат зоналари,

ёшлар саноат ва тадбиркорлик зоналарида инвестиция ва

ижтимоий мажбуриятларнинг бажарилишини қабул қилиш

ҳамда давлат кўчмас мулк объектларини хусусийлаштириш

масалалари бўйича Ҳукумат комиссиясининг

ТАРКИБИ

              

              

Изоҳ. Комиссия аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли функцияларни бажариш юкланган шахслар киритилади.

                   

            

Қонун ҳужжатлари маълумотлари миллий базаси (www.lex.uz),

2024 йил 20 июль