Органик ер майдонларига белги ва кўрсаткичлар ўрнатиш шакли ва тартиби тўғрисида Низом (ЎзР ВМ 22.01.2021 й. 33-сон қарорига илова)

Функция недоступна

Вазирлар Маҳкамасининг

2021 йил 22 январдаги

33-сон қарорига

ИЛОВА

Органик ер майдонларига белги ва кўрсаткичлар

ўрнатиш шакли ва тартиби тўғрисида

НИЗОМ

1-БОБ. УМУМИЙ ҚОИДАЛАР

1. Мазкур Низом органик ер майдонларига белги ва кўрсаткичлар ўрнатиш шакли ҳамда тартибини белгилайди.

2. Ушбу Низомнинг қоидалари органик қишлоқ хўжалиги маҳсулотларни етиштирувчи ва ёввойи ҳолда ўсувчи ўсимлик маҳсулотларини йиғиб олувчи хўжаликларга нисбатан татбиқ этилади.

3. Мазкур Низомда қуйидаги асосий тушунчалар қўлланилади:

белги - органик қишлоқ хўжалиги маҳсулотларини етиштириш ва ёввойи ҳолда ўсувчи ўсимликларни йиғиб олиш учун танланган ер майдони ҳамда мазкур ер майдонида фаолият юритувчи хўжалик тўғрисидаги кўрсаткичларни ўз ичига олган маълумотлар пешлавҳаси;

кўрсаткич - органик қишлоқ хўжалиги маҳсулотларини етиштириш ёки ёввойи ҳолда ўсувчи ўсимликларни йиғиб олиш учун танланган ер майдони ҳамда мазкур ер майдонида фаолият юритувчи хўжалик тўғрисидаги умумлаштирилган тавсифи;

органик қишлоқ хўжалиги маҳсулотларини етиштириш ёки ёввойи ҳолда ўсувчи ўсимликларни йиғиб олишга танланган ер майдони - органик қишлоқ хўжалиги маҳсулотларни етиштириш ёки ёввойи ҳолда ўсувчи ўсимликларни йиғиб олишга мўлжалланган ер майдонининг белгиланган талабларга мувофиқлиги;

органик ер майдонлари - мувофиқлик сертификатига эга бўлган, органик қишлоқ хўжалиги маҳсулотлари етиштирадиган ёки ёввойи ҳолда ўсган ўсимликлар йиғиб олинадиган ер майдонлари;

органик маҳсулот - ишлаб чиқариш, қайта ишлаш ва савдо қилишнинг барча босқичларида миллий органик стандарт талабларига мувофиқ бўлган ишлаб чиқариш технологияларини қўллаш орқали олинган маҳсулот;

тупроқ ва сув таркибини таҳлил қилиш - органик қишлоқ хўжалиги маҳсулотларини етиштирувчи ҳамда ёввойи ҳолда ўсувчи ўсимликларни йиғиб олувчи хўжалик ер майдонларининг сўнгги уч йиллик статистик таҳлил натижаларини ҳамда топографик жойлашувини ўрганиш, тупроқ таркибини, сизот ва оқова сувларнинг сифатини лабораторияда таҳлил қилиш.

2-БОБ. ОРГАНИК МАҲСУЛОТЛАР

ЕТИШТИРИШДА ВА ЙИҒИБ ОЛИШДА ЕР

МАЙДОНЛАРИГА ҚЎЙИЛАДИГАН ТАЛАБЛАР

ҲАМДА БЕЛГИ ЎРНАТИШ ТАРТИБИ

4. Органик қишлоқ хўжалиги маҳсулотларини етиштирувчи ёки ёввойи ҳолда ўсувчи ўсимликларни йиғиб олиш билан шуғулланувчи хўжаликнинг танланган ер майдонида фаолият олиб бориш ҳуқуқига эга эканлигини тасдиқловчи ҳужжатларни мувофиқликни баҳолаш органига тақдим этади.

5. Органик қишлоқ хўжалиги маҳсулотларини етиштирувчи ёки ёввойи ҳолда ўсувчи ўсимликларни йиғиб олувчи хўжаликнинг ер майдонидаги тупроқ таркибидаги сизот ва оқова сувларнинг сифати (минераллашув) таҳлил қилинади.

6. Органик қишлоқ хўжалиги маҳсулотларини етиштириш учун ер майдонини танлашда охирги уч йилда шу майдонда экилган қишлоқ хўжалиги экин турлари, қўлланилган агротехник тадбирлар, берилган минерал ўғитлар турлари ва миқдори (қолдиқ) ўрганиб чиқилади.

7. Органик қишлоқ хўжалиги маҳсулотларини етиштиришга танланган ер майдонининг атрофида анъанавий усулда етиштирилган қишлоқ хўжалиги экинларнинг тури, суғориш тизими, ер майдони чегараларида иҳотазорлар барпо этиш магистрал канал ва автомобиль йўллари билан оралиқ масофани ҳисобга олган ҳолда таҳлил қилинади.

8. Тупроқнинг физик-механик, кимёвий, микробиологик ва агрокимёвий таркиби лабораторияда таҳлил қилинади.

9. Республикада камайиб бораётган ва муҳофазага олинган ҳамда Ўзбекистон Республикасининг Қизил китобига киритилган ёввойи ҳолда ўсувчи ўсимлик турларини йиғиб олишга рухсат берилмайди.

10. Танланган ер майдонида тупроқ таркиби, иқлим шароитини ҳисобга олган ҳолда, қишлоқ хўжалиги экинлари бир йиллик ёки кўп йиллик турларга қараб жойлаштирилади.

11. Органик қишлоқ хўжалиги маҳсулотларини етиштиришга танланган ер майдони бўйича барча таҳлил натижалари ижобий бўлган тақдирда хўжалик томонидан мазкур ер майдонининг кириш йўлагига органик қишлоқ хўжалигига ўтиш даврини билдирувчи қуйидаги кўрсаткичлар ўзида акс эттирган белги ўрнатади:

ер майдонига эгалик қилувчи хўжалик номи;

хўжалик жойлашган жой (почта манзили);

хўжалик раҳбарининг Ф.И.О.;

умумий ер майдони харитаси, гектар, органик ер майдони гектари, контури;

етиштириладиган органик қишлоқ хўжалиги маҳсулот номи;

қишлоқ хўжалиги экин турларидан келиб чиқиб, органик қишлоқ хўжалиги маҳсулотларини етиштиришга (боғ, узумзор, техник ва озиқ-овқат экинлари ҳамда озиқабоп ем-хашак экинлари) ўтиш даврининг муддати;

радиуси 3 км дан кам бўлмаган асаларичилик хўжалиги ҳудудининг харитаси ҳамда асалари уяларини ҳудуддан ҳудудга кўчириш талаб этилса, кўчиш ҳудудларининг хариталари (асаларичилик хўжаликлари учун);

чорвачилик ва паррандачилик хўжаликлари иншоотларининг ер майдонида (гектар) жойлашув схемаси ҳамда яйловлар харитаси кўрсатилган белги.

12. Ёввойи ҳолда ўсувчи ўсимликларни йиғиб олувчи хўжалик мурожаатига кўра, мувофиқликни баҳолаш органи томонидан берилган органик мувофиқлик сертификатига асосан танланган ер майдонига ўрнатилган белгида органик ўтиш даври белгиланмайди.

13. Ёввойи ҳолда ўсувчи ўсимликларни йиғиб олиш жараёнига органик мувофиқлик сертификати олган хўжалик органик ер майдонининг кириш чегарасига қуйидаги кўрсаткичларни ўзида акс эттирган белгини ўрнатади:

органик маҳсулотлари йиғиб олинадиган хўжалик номи;

хўжалик раҳбарининг Ф.И.О.;

ер майдонининг харитаси, майдони (гектар);

йиғиб олинадиган маҳсулот номи;

мувофиқликни баҳолаш идораси номи (телефон рақами ва электрон почта манзили);

органик мувофиқлик сертификатининг рақами ва амал қилиш муддати.

14. Қишлоқ хўжалиги маҳсулотларини етиштирувчи хўжалик томонидан органик қишлоқ хўжалигига ўтиш муддатини билдирувчи белгида кўрсатилган маълумотга ўтиш муддати тугагунга қадар ўзгартириш киритилмайди.

15. Органик қишлоқ хўжалиги маҳсулотларини етиштириш жараёнига мувофиқликни баҳолаш органи томонидан берилган органик мувофиқлик сертификатига асосан хўжалик томонидан органик ер майдонининг кириш йўлагига қуйидаги кўрсаткичларни ўзида акс эттирган белги ўрнатилади:

ер майдонларига эгалик қилувчи хўжалик номи;

хўжалик раҳбарининг Ф.И.О.;

ер майдонининг харитаси, майдони (гектар);

етиштириладиган маҳсулот номи;

хўжалик жойлашган жой (почта манзили);

мувофиқликни баҳолаш органи номи (телефон рақами ва электрон почта манзили);

органик мувофиқлик сертификатнинг рақами ва амал қилиш муддати.

3-БОБ. ЯКУНЛОВЧИ ҚОИДАЛАР

16. Органик қишлоқ хўжалиги маҳсулотларини етиштириш ёки ёввойи ҳолда ўсувчи ўсимликларни йиғиб олишишлари билан боғлиқ харажатлар ушбу фаолият билан шуғулланувчи хўжалик маблағи ҳисобидан амалга оширилади.

17. Органик қишлоқ хўжалиги маҳсулотларини етиштириш ва ёввойи ҳолда ўсувчи ўсимликларни йиғиб олиш жараёнларида юзага келадиган низолар қонун ҳужжатларида белгиланган тартибда ҳал этилади.

18. Мазкур Низом талаблари бузилишида айбдор шахслар қонун ҳужжатларида белгиланган тартибда жавоб берадилар.

Қонун ҳужжатлари маълумотлари миллий базаси (www.lex.uz),

2021 йил 23 январь