Ўзбекистон Республикаси Президентининг 17.01.2022 й. ПҚ-90-сон "Капитал бозорини қўллаб-қувватлашнинг самарали механизмларини жорий этишга доир қўшимча чора-тадбирлар тўғрисида"ги Қарори

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

17.01.2022 й.

N ПҚ-90

КАПИТАЛ БОЗОРИНИ ҚЎЛЛАБ-ҚУВВАТЛАШНИНГ

САМАРАЛИ МЕХАНИЗМЛАРИНИ ЖОРИЙ ЭТИШГА

ДОИР ҚЎШИМЧА ЧОРА-ТАДБИРЛАР ТЎҒРИСИДА

Капитал бозорини янада ривожлантириш, давлат акция пакетларини капитал бозори орқали хусусийлаштириш амалиётини кенгайтириш, аҳолининг қимматли қоғозларга инвестиция киритишини рағбатлантириш ва молия бозорида соғлом рақобат муҳитини яратиш мақсадида:

1. Белгилансинки, 2022 йил 1 апрелдан 2028 йил 31 декабрга қадар:

Ўзбекистон Республикасининг резиденти ва норезиденти бўлган жисмоний шахсларнинг акциялар бўйича ҳисобланган дивидендлар тарзидаги даромадлари даромад солиғидан озод қилинади;

Ўзбекистон Республикасининг норезиденти бўлган юридик шахсларнинг акциялар бўйича ҳисобланган дивидендлар тарзидаги даромадларига Ўзбекистон Республикасининг резиденти бўлган юридик шахслар сингари фойда солиғининг 5 фоиз ставкаси татбиқ этилади;

Ўзбекистон Республикасининг резиденти ва норезиденти бўлган жисмоний ва юридик шахсларнинг хўжалик жамиятлари облигациялари бўйича ҳисобланган фоизлар тарзидаги даромадлари жисмоний шахслардан олинадиган даромад солиғи ва юридик шахслардан олинадиган фойда солиғидан озод қилинади.

2. Шундай тартиб ўрнатилсинки, унга мувофиқ:

акциядорлар умумий йиғилиши томонидан жамият акцияларини фонд биржасининг биржа котировка варағидан чиқариш тўғрисида қарор қабул қилинганда, ушбу жамият овоз берувчи акцияларининг эгалари бўлган акциядорларга ўзларига тегишли акцияларнинг жамият томонидан қайтариб сотиб олинишини талаб қилиш ҳуқуқи берилади;

қимматли қоғозларнинг биржадан ташқари уюшган савдосида қимматли қоғозларга доир битимлар тузилганда сотувчи (эмитент бундан мустасно) томонидан фойда солиғи ва даромад солиғи ўрнига битим суммасининг 0,3 фоизи миқдорида йиғим Ўзбекистон Республикаси Истиқболли лойиҳалар миллий агентлигига тўланади.

3. Давлат активларини бошқариш агентлиги ва Молия вазирлигининг 1-иловага мувофиқ рўйхат бўйича акциядорлик жамиятлари акцияларининг "Тошкент" республика фонд биржасида бирламчи (IPO) ва (ёки) иккиламчи (SPO) оммавий таклифини ўтказиш тўғрисидаги таклифи маъқуллансин.

Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясига Давлат активларини бошқариш агентлиги, Иқтисодиёт ва молия вазирлиги ва Ўзбекистон Республикаси Истиқболли лойиҳалар миллий агентлигининг асослантирилган таклифларига мувофиқ, шу жумладан, бозор ҳолати ва андеррайтерлар хулосаларини инобатга олиб, Ўзбекистон Республикаси Президенти қарорларига асосан бирламчи (IPO) ва (ёки) иккиламчи (SPO) оммавий таклиф этиладиган акциялар пакетининг ҳажмини ва савдога чиқариш муддатини белгилаш, уларнинг рўйхатига ўзгартириш ва қўшимчалар киритиш ваколати берилсин.

Вазирлар Маҳкамаси икки ой муддатда мазкур қарорнинг 1-иловасига асосан акцияларининг оммавий таклифи ўтказилиши белгиланган ҳар бир корхона бўйича алоҳида "йўл хариталари" тасдиқланишини таъминласин.

4. Молия вазирлиги ва Давлат активларини бошқариш агентлигининг 2023 йил 31 декабрга қадар эксперимент тариқасида хорижий банклар ва инвестиция воситачиларига Ўзбекистон Республикасида алоҳида лицензия олмасдан қимматли қоғозлар бозорида андеррайтинг фаолиятини амалга ошириш ҳуқуқига эга бўлган ва ўз маблағларининг миқдори 500 млн сўмдан кам бўлмаган маҳаллий юридик шахслар билан шартнома тузган ҳолда, андеррайтинг фаолиятини амалга оширишга рухсат бериш тўғрисидаги таклифи маъқуллансин.

Истиқболли лойиҳалар миллий агентлиги 2025 йил 1 февралга қадар эксперимент натижаларини чуқур таҳлил қилган ҳолда, уни қимматли қоғозлар бозорида андеррайтинг фаолиятини амалга ошириш ҳуқуқига эга бўлган барча иштирокчиларга татбиқ этишнинг мақсадга мувофиқлиги юзасидан таклиф киритсин.

5. 2022 йил 1 апрелдан бошлаб маҳаллий эмитентларга ўз акцияларини дастлаб "Тошкент" РФБда жойлаштиргандан сўнг андеррайтер тавсиясига кўра уларни хорижий фонд бозорларида ёки бир вақтда маҳаллий ва хорижий фонд биржаларида жойлаштириш ҳуқуқи берилсин.

6. Ўзбекистон Республикаси Президентининг 2007 йил 7 ноябрдаги "Банк тизимини янада ривожлантириш ва бўш пул маблағларини банк айланмасига жалб этиш чора-тадбирлари тўғрисида"ги ПҚ-726-сон қарорига асосан банк фаолиятини амалга ошириш лицензиясига эга бўлган тижорат банклари қимматли қоғозлар бозорида инвестиция воситачиси фаолиятини амалга оширишга ҳақли эканлиги маълумот учун қабул қилинсин.

Молия вазирлиги икки ой муддатда давлат улуши мавжуд тижорат банклари томонидан қимматли қоғозлар бозорида инвестиция воситачиси фаолиятини йўлга қўйиш масаласини уларнинг бошқарув органлари йиғилишларида кўриб чиқсин.

7. Молия вазирлиги:

манфаатдор идоралар билан биргаликда уч ой муддатда Ўзбекистон Республикаси Солиқ кодекси, Ўзбекистон Республикасининг "Акциядорлик жамиятлари ва акциядорларнинг ҳуқуқларини ҳимоя қилиш тўғрисида"ги ва "Қимматли қоғозлар бозори тўғрисида"ги қонунларига мазкур қарордан келиб чиқадиган ўзгартириш ва қўшимчаларни киритиш бўйича қонун лойиҳасини Вазирлар Маҳкамасига киритсин;

Давлат активларини бошқариш агентлиги билан биргаликда икки ой муддатда "Тошкент" республика фонд биржасида биржа листингига киритилмаган қимматли қоғозлар савдосини таъминловчи тизимни яратсин.

8. Вазирлар Маҳкамасининг 2017 йил 10 майдаги "Фонд биржасида акцияларнинг оммавий таклифини ўтказишни ташкил этиш тўғрисида"ги 268-сон қарорига 2-иловага мувофиқ ўзгартиришлар ва қўшимча киритилсин.

9. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари Ж.А. Қўчқоров зиммасига юклансин.

Ўзбекистон Республикаси Президенти                                                            Ш. Мирзиёев

Ўзбекистон Республикаси

Президентининг

2022 йил 17 январдаги

ПҚ-90-сон қарорига

1-ИЛОВА

"Тошкент" РФБда акцияларининг бирламчи (IPO)

ва (ёки) иккиламчи (SPO) оммавий таклифи

ўтказиладиган акциядорлик жамиятлари

РЎЙХАТИ

(1) давлат ва хўжалик бошқаруви органи улуши 50 фоиз ва ундан юқори бўлган хўжалик жамиятига тегишли акция пакетлари;

(2) давлат улуши ва давлат улуши мавжуд корхона улуши битта лот сифатида савдога чиқарилиши мумкин.

(3) давлат ва давлат иштирокидаги корхоналар улуши.

Ўзбекистон Республикаси

Президентининг

2022 йил 17 январдаги

ПҚ-90-сон қарорига

2-ИЛОВА

Вазирлар Маҳкамасининг 2017 йил 10 майдаги

"Фонд биржасида акцияларни оммавий таклифини

ўтказишни ташкил этиш тўғрисида"ги 268-сон қарорига

киритилаётган ўзгартиришлар ва қўшимча

1. 3-банднинг рус тилидаги матнида:

а) иккинчи хатбоши қуйидаги таҳрирда баён этилсин:

"цена предложения акций путем проведения первичного (IPO) и вторичного (SPO) публичных предложений акций определяется организатором";

б) қуйидаги мазмундаги хатбошилар билан тўлдирилсин:

"сбор заявок на приобретение акций, реализуемых посредством первичного (IPO) и вторичного (SPO) публичных предложений акций, осуществляется организатором или группой организаторов, с которыми заключено соглашение о проведении указанных IPO или SPO;

организатору предоставляется право на выбор инвесторов для распределения акций на основе договора, заключенного с инициатором, а также установление срока запрета реализации инвесторами акций, приобретенных в рамках первичного (IPO) и вторичного (SPO) публичных предложений акций;

распределение акций посредством IPO и SPO проводится на основе единой цены, определяемой организатором исходя из спроса и предложения на акции".

2. 2-илованинг рус тилидаги матнида:

а) 9-банд қуйидаги таҳрирда баён этилсин:

"9. Организатором, по результатам предварительного изучения акционерного общества, определяется диапазон цен предложения акций для сбора заявок на покупку акций";

б) 13-банд қуйидаги таҳрирда баён этилсин:

"13. Сбор заявок на приобретение акций, реализуемых посредством первичного (IPO) и вторичного (SPO) публичных предложений акций, осуществляется организатором или группой организаторов, с которыми заключено соглашение о проведении указанных IPO или SPO";

в) 15-банд қуйидаги таҳрирда баён этилсин:

"15. Цена предложения акций путем IPO и SPO определяется организатором".

Қонун ҳужжатлари маълумотлари миллий базаси (www.lex.uz),

2022 йил 17 январь