Ер қаъри участкаларидан фойдаланиш ҳуқуқи учун рухсатномалар бериш тартиби тўғрисида Низом (ЎзР ВМ 25.03.2022 й. 133-сон қарорига 1-илова)

Функция недоступна

Вазирлар Маҳкамасининг

2022 йил 25 мартдаги

133-сон қарорига

1-ИЛОВА

Ер қаъри участкаларидан фойдаланиш ҳуқуқи

учун рухсатномалар бериш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом ер қаъри участкаларидан фойдаланиш ҳуқуқи учун рухсатнома бериш тартибини белгилайди.

2. Ушбу Низом ер қаъри участкалари фойдаланишга, шу жумладан, алоҳида битимлар асосида фойдаланишга берилган ҳолатларга нисбатан қўлланилади, маҳсулот тақсимотига оид битимлар ҳамда концессия соҳасидаги қонунчилик ҳужжатларида бошқача қоидалар назарда тутилган ҳоллар бундан мустасно.

Ушбу Низомнинг амал қилиши норуда фойдали қазилмаларни ўз ичига олган ер қаъри участкаларидан фойдаланиш ва қимматбаҳо металларни олтин изловчилар усулида қазиб олиш ҳуқуқи учун рухсатномалар беришга нисбатан татбиқ этилмайди.

3. Ушбу Низомда қуйидаги асосий тушунчалар қўлланилади:

"E-auksion" электрон савдо платформаси (кейинги ўринларда - савдо платформаси) - электрон онлайн-аукционларни ташкил этиш ва ўтказиш учун зарур бўлган ахборотни киритиш, сақлаш ва қайта ишлаш, шунингдек, манфаатдор шахсларнинг аукционлар жараёнларидан оператор веб-портали орқали бевосита фойдаланиш имкониятини таъминлайдиган ахборот тизими;

геологик жиҳатдан ўрганиш учун стратегик турдаги (асосий) фойдали қазилмаларни ўз ичига олган ер қаъри участкасидан фойдаланиш ҳуқуқини берадиган рухсатнома - унинг эгасини тадбиркорлик таваккалчилиги шартлари асосида (ер қаъридан фойдаланувчининг ўз маблағлари ҳисобидан) фойдали қазилма конларини қидириш, баҳолаш, разведка қилиш ҳуқуқини тасдиқловчи ҳужжат;

кон ажратиш далолатномаси - рухсатномага мувофиқ ва ер ости бойликларидан фойдаланиш ҳуқуқини берувчи рухсатномада кўрсатилган мақсадларда фойдаланишга берилган майдони ва чуқурлигига кўра чекланган ер қаърининг геометриклаштирилган участкаси;

маҳсулот тақсимоти тўғрисидаги битим, концессия ва бошқа алоҳида инвестиция битимлари - шартнома ҳисобланиб, унга мувофиқ Ўзбекистон Республикаси ҳақ олиш асосида ва муайян муддатга чет эллик инвесторга битимда кўрсатилган ер қаъри участкасида конларни аниқлаш, қидириш ва фойдали қазилмаларни қазиб чиқариш ҳамда шулар билан боғлиқ бўлган ишларни олиб бориш учун мутлақ ҳуқуқлар беради, инвестор эса ушбу ишларни ўз маблағлари ҳисобига ва таваккал қилиб амалга ошириш мажбуриятини олади (кейинги ўринларда - алоҳида битимлар);

муҳофаза этиладиган геологик объектларни барпо этиш учун ер қаъри участкасидан фойдаланиш ҳуқуқини берадиган рухсатнома - унинг эгасини илмий ва ўқув полигонлари, геологик қўриқхоналар, табиат ёдгорликлари ҳамда илмий, тарихий, маданий, эстетик ва бошқа аҳамиятга молик бўлган ўзгача объектларни белгилаш, шунингдек, ғорлар ҳамда бошқа ер ости бўшлиқларидан илмий, даволаш-соғломлаштириш ёки туристик мақсадларда фойдаланиш ҳуқуқини тасдиқловчи ҳужжат;

нодир тош хомашёси намуналарини, палеонтологик қолдиқларни ва бошқа геологик коллекциябоп материалларни тўплаш учун ер қаъри участкасидан фойдаланиш ҳуқуқини берадиган рухсатнома - унинг эгасини ер юзасига чиқиб қолган табиий жинслар, табиий ер ости бўшлиқлари (ғорлар), ишлатиб бўлинган конлар, кон қазиш корхоналарининг ағдармаларидан (кон ажратиш далолатномаси эгаси билан келишув бўйича) нодир тош хомашёсининг якка-ёлғиз намуналарини, палеонтологик қолдиқларни ва бошқа геологик коллекциябоп материалларни ажратиб олиш, шунингдек, кон ишлари ва махсус ишларнинг бошқа турларини амалга оширмасдан (ер қаъри яхлитлигини бузмасдан) дарёларнинг қайирларида намуналарни тўплаш ҳуқуқини тасдиқловчи ҳужжат;

оператор - Ўзбекистон Республикаси Давлат активларини бошқариш агентлиги ҳузуридаги "Электрон онлайн-аукционларни ташкил этиш маркази" давлат унитар корхонаси;

стратегик турдаги (асосий) фойдали қазилмалар - олтин, кумуш, мис, қўрғошин, рух, вольфрам, уран, платина ва платиноидлар, нодир металлар ва нодир ер элементлари, темир, марганец, қимматбаҳо тошлар ҳамда углеводородлар (нефть, газ, конденсат) ва улар билан боғлиқ компонентлар, саноат аҳамиятига молик ер ости сувлари, кўмир, ёнувчи сланецлар;

техноген минерал ҳосилалардан фойдаланиш учун ер қаъри участкасидан фойдаланиш ҳуқуқини берадиган рухсатнома - унинг эгасини кон қазиш ва қайта ишлаш ишлаб чиқаришларининг таркибида фойдали компонентлар мавжуд бўлган чиқиндиларини қонун ҳужжатларида назарда тутилган зарур рухсат берувчи ҳужжатлар олинишини ҳисобга олган ҳолда қайта ишлаш ҳуқуқини тасдиқловчи ҳужжат;

Фойдали қазилмаларни кавлаб олиш билан боғлиқ бўлмаган мақсадларда ер ости иншоотларини қуриш ва ишлатиш учун ер қаъри участкаларидан фойдаланиш ҳуқуқини берадиган рухсатнома - унинг эгасини ер ости иншоотларини қуриш ва улардан фойдаланиш, шу жумладан, углеводородларни ер остида сақлаш, чиқиндиларни сақлаш ва кўмиб ташлаш учун ер қаърининг муайян участкасидан фойдаланиш ҳуқуқини тасдиқловчи ҳужжат;

фойдали қазилмаларни кавлаб олиш учун ер қаъри участкасидан фойдаланиш ҳуқуқини берадиган рухсатнома - унинг эгасини фойдали қазилма конини ишлатиш, қазиб олинган минерал хомашёни қайта ишлаш, шу жумладан, агар рухсатнома шартларида бошқа қоида назарда тутилмаган бўлса, қазиб чиқариш жараёнида олинган техноген минерал ҳосилалардан қонун ҳужжатларида назарда тутилган зарур рухсат берувчи ҳужжатлар олинишини ҳисобга олган ҳолда фойдаланиш (қайта ишлаш) ҳуқуқини тасдиқловчи ҳужжат.

4. Геологик жиҳатдан ўрганиш учун тадбиркорлик таваккалчилиги шартларида фойдали қазилма конларини қазиб олиш, техноген минерал ҳосилалардан фойдаланиш ва бошқа мақсадлар, фойдали қазилмаларни кавлаб олиш билан боғлиқ бўлмаган ва ушбу Низомда назарда тутилган ер қаъри участкасидан фойдаланиш ҳуқуқини бериш учун асос рухсатнома ҳисобланади.

Белгиланган тартибда тасдиқланган лойиҳа-смета ҳужжатлари Давлат геология қўмитасининг буюртмаси бўйича минерал хомашё базасини ривожлантириш ва қайта ишлаб чиқариш давлат дастурлари доирасида ер қаърини геологик ўрганиш учун ер қаъри участкаларидан фойдаланиш ҳуқуқи пайдо бўлиши учун асос ҳисобланади.

Рухсатнома маълум бир муддат белгиланган аниқ чегаралар доирасида унинг эгасининг ер қаъри участкаларидан фойдаланиш ҳуқуқини тасдиқлайди ва ер қаъри участкаларидан фойдаланиш шартларини белгилайди.

5. Ер қаъри участкаларидан фойдаланиш ҳуқуқи учун рухсатномалар берувчи ваколатли органлар (кейинги ўринларда - ваколатли орган):

Ўзбекистон Республикаси Экология ва атроф-муҳитни муҳофаза қилиш давлат қўмитаси (кейинги ўринларда - Давлат экология қўмитаси) томонидан - чиқиндиларни сақлаш ва кўмиб ташлаш мақсадида ер ости иншоотларини қуриш ва фойдаланиш учун;

Давлат геология қўмитаси томонидан - ер қаъри участкасидан фойдаланиш ҳуқуқининг бошқа барча турлари учун берилади.

2-БОБ. ЕР ҚАЪРИ УЧАСТКАЛАРИДАН ФОЙДАЛАНИШ

ҲУҚУҚИНИ БЕРАДИГАН РУХСАТНОМА

6. Ер қаъри участкасидан фойдаланиш ҳуқуқини берадиган рухсатнома қуйидаги мақсадлар учун берилади:

геологик жиҳатдан ўрганиш;

фойдали қазилмаларни кавлаб олиш;

техноген минерал ҳосилалардан фойдаланиш;

Фойдали қазилмаларни кавлаб олиш билан боғлиқ бўлмаган мақсадларда ер ости иншоотларини қуриш ва ишлатиш учун ер қаъри участкаларидан фойдаланиш;

муҳофаза этиладиган геологик объектларни барпо этиш;

нодир тош хомашёси намуналарини, палеонтологик қолдиқларни ва бошқа геологик коллекциябоп материалларни тўплаш.

Рухсатнома, қоидага кўра, ушбу бандда белгиланган ер қаъридан фойдаланишнинг ҳар бир тури учун алоҳида берилади.

7. Рухсатномалар аукцион савдолари, танлов натижалари ёки "биринчи келган биринчи олади" тамойилига асосан талабгор аризасини кўриб чиқиш (юридик шахсларнинг Ваколатли орган билан тўғридан-тўғри музокаралар олиб бориши) натижаси асосида ушбу Низомда белгиланган тартибда берилади.

8. Ер қаъри участкаларидан фойдаланиш ҳуқуқи учун рухсатномалар:

ўрганилганлик даражаси ва кон очиш салоҳияти юқори бўлган истиқболли майдонларни геологик ўрганиш учун электрон платформада ўтказиладиган аукцион натижаларига кўра ушбу Низомга 1-иловага мувофиқ схема бўйича;

ўрганилмаган ёки кам ўрганилган ер қаъри участкаларини геологик ўрганиш учун "биринчи келган биринчи олади" тамойилига асосан талабгор аризасини кўриб чиқиш орқали ушбу Низомнинг 7-бобига ва 4-иловага мувофиқ схема бўйича;

фойдали қазилмаларни қазиб олиш, техноген минерал ҳосилалардан фойдаланиш (ер қаъридан фойдаланувчининг балансида бўламаганда) учун аукцион ёки танлов (тендер) натижаларига кўра мос равишда ушбу Низомнинг 5-боби ва 1-иловасига ҳамда 6-боби 2 ва 4-иловаларига мувофиқ схемалар бўйича;

фойдали қазилмаларни кавлаб олиш билан боғлиқ бўлмаган мақсадларда ер ости иншоотларини қуриш ва ишлатиш учун ер қаъри участкаларидан фойдаланиш, шу жумладан, чиқиндиларни сақлаш ва кўмиб ташлаш мақсадида, муҳофаза этиладиган геологик объектларни барпо этиш, нодир тош хомашёси намуналарини, палеонтологик қолдиқларни ва бошқа геологик коллекциябоп материалларни тўплаш учун "биринчи келган биринчи олади" тамойилига асосан талабгор аризасини кўриб чиқиш йўли билан ушбу Низомнинг 7-бобига ва 6, 8 ҳамда 10-иловаларга мувофиқ схемалар бўйича берилади.

9. Ер қаърини геологик жиҳатдан ўрганиш бўйича ишларни молиялаштирган юридик шахслар рухсатномага мувофиқ ўзлари разведка қилиб, аниқлаган конда фойдали қазилмаларнинг захиралари Давлат геология қўмитаси ҳузуридаги Фойдали қазилмалар захиралари бўйича давлат комиссиясида (кейинги ўринларда - Давлат комиссияси) тасдиқланган санадан бошлаб бир йил мобайнида фойдали қазилмаларни кавлаб олиш учун рухсатнома олиш юзасидан мутлақ ҳуқуққа (кейинги ўринларда - мутлақ ҳуқуқ) эгадирлар.

Фойдали қазилмаларни кавлаб олиш учун ер қаъри участкасидан фойдаланиш ҳуқуқи учун рухсатнома юридик шахснинг мутлақ ҳуқуқининг амал қилиш муддати давомида "биринчи келган биринчи олади" тамойилига асосан талабгор аризасини кўриб чиқиш орқали ушбу Низомнинг 7-бобида белгиланган тартибда берилади.

Бунда, мутлақ ҳуқуқ амал қилиш муддати тугагунга қадар ушбу топилган конларда фойдали қазилмаларни кавлаб олиш учун ер қаъри участкасидан фойдаланиш ҳуқуқини берадиган рухсатномани қидириш ишларини ўз ҳисобидан ўтказган юридик шахслардан ташқари бошқа шахсларга бериш тақиқланади.

Ер қаърини геологик жиҳатдан ўрганиш ишларини ўз маблағлари ҳисобига ўтказган юридик шахс ўзи разведка қилган кондаги фойдали қазилмаларни кавлаб олиш ҳуқуқидан воз кечган ёки фойдали қазилмаларни кавлаб олиш учун ер қаъри участкаларидан фойдаланиш ҳуқуқини берадиган рухсатномани олиш учун мутлақ ҳуқуқнинг муддати тугаган тақдирда фойдали қазилмалар конлари бўйича мазкур ҳуқуқ ушбу Низомда белгиланган тартибда аукцион ёки танлов (тендер) савдоси орқали талабгор юридик шахсларга таклиф этилади.

Бунда, ушбу банднинг учинчи хатбошиcида кўрсатилган ҳолатларда юридик шахснинг қилган харажатлари, шу жумладан, ер қаъри тўғрисидаги геологик ва бошқа ахборотлар қиймати қопланмайди.

10. Ер қаъри участкаларидан фойдаланиш ҳуқуқи учун рухсатномалар қуйидаги ҳолларда "биринчи келган биринчи олади" тамойилига асосан талабгор аризасини кўриб чиқиш орқали берилиши мумкин:

ер қаърини геологик жиҳатдан ўрганиш ишларини ўз маблағлари ҳисобига ўтказган юридик шахс ўзи разведка қилган кондаги фойдали қазилмаларни кавлаб олиш ҳуқуқига;

Ўзбекистон Республикаси Президенти ва Вазирлар Маҳкамасининг қарор ва фармойишларига мувофиқ;

ер қаърини геологик ўрганишга доир ишларни молиялаштирган юридик шахс ўзи қидириб, аниқлаган кондан фойдали қазилмаларни кавлаб олиш учун мутлақ ҳуқуқни, Давлат геология қўмитаси билан келишилган ҳолда, бошқа шахсга (тўлиқ ёки қисман) бериш истагини билдирган тақдирда.

11. Фойдали қазилмаларни баҳолаш ва разведка қилиш босқичларида лойиҳа-смета ҳужжатларида асосланган ва фойдали қазилмалар захирасини ҳисоблаб чиқиш ва унинг сифатини баҳолаш учун етарли бўлган ҳажмда тажриба (намуна) ва тажриба-саноат усулида кавлаб олиш учун ер қаъри участкаларидан фойдаланиш ҳуқуқини берадиган рухсатнома олиш геологик ўрганишга доир рухсатнома мавжуд бўлганда талаб қилинмайди.

12. Фойдали қазилмаларни кавлаб олиш учун ер қаъри участкасидан фойдаланиш ҳуқуқини берадиган рухсатнома Давлат комиссияси томонидан захираси тасдиқланган фойдали қазилма конларига берилади.

13. Фойдали қазилмаларни кавлаб олиш учун ер қаъри участкасидан фойдаланиш ҳуқуқини берадиган рухсатнома, агар бу конларни ишга туширишнинг техник-иқтисодий кўрсаткичларини ёмонлаштирмаса ва конларнинг бошқа қисмларини ишга тушириш учун тўсқинлик қилмаса, коннинг алоҳида участкасида фойдали қазилмаларни кавлаб олиш учун берилишига йўл қўйилади.

14. Бир коннинг бир нечта ер қаъридан фойдаланувчи томонидан ишга туширилиши учун ер қаъри участкаларидан фойдаланиш ҳуқуқини берадиган рухсатномалар берилишига йўл қўйилади.

15. Агар бажарилган техник-иқтисодий ҳисоб-китобларга мувофиқ конларнинг фақат бир нафар ер қаъридан фойдаланувчи томонидан биргаликда ишга туширилиши рентабелли ҳисобланса, бир-бирига яқин жойлашган конларни ишга солиш учун ер қаъридан бир нафар фойдаланувчига ер қаъри участкаларидан фойдаланиш ҳуқуқини берадиган бир нечта рухсатнома бир вақтда берилишига йўл қўйилади.

16. Ер қаъри участкасидан фойдаланиш ҳуқуқини берадиган рухсатноманинг эгаси фойдали қазилмаларни кавлаб олиш билан боғлиқ бўлган ер қаърини геологик жиҳатдан ўрганиш бўйича ишларни унга берилган кон ажратиш далолатномаси доирасида, ушбу ишлар Давлат геология қўмитасида давлат ҳисобига олиниши шарти билан қўшимча рухсатномасиз амалга ошириш ҳуқуқига эга бўлади.

17. Фойдали қазилмаларни кавлаб олиш учун ер қаъри участкасидан фойдаланиш ҳуқуқини берадиган рухсатномага мувофиқ фойдали қазилмаларни қазиб олиш ва минерал хомашёни қайта ишлаш жараёнида олинган техноген минерал ҳосилаларга мулк ҳуқуқи ер қаъри участкасидан фойдаланиш муддатида рухсатнома эгасида сақланиб қолади. Ушбу ҳолатда техноген минерал ҳосилалардан фойдаланишга (қайта ишлашга) рухсатнома олиш талаб қилинмайди.

18. Техноген минерал ҳосилалардан фойдаланиш учун ер қаъри участкасидан фойдаланиш ҳуқуқини берадиган рухсатнома ер қаъридан фойдаланувчининг балансида бўлмаган ишлаб чиқариш чиқиндиларини қайта ишлаш учун ёхуд техноген минерал ҳосилалар белгиланган тартибда бошқа ер қаъридан фойдаланувчига сотилган ёки берилган тақдирда берилади.

19. Техноген минерал ҳосилалар бошқа шахсга белгиланган тартибда сотилган ёки берилган тақдирда ёки агар фойдали қазилмаларни кавлаб олиш учун ер қаъри участкасидан фойдаланиш ҳуқуқи учун берилган рухсатноманинг амал қилиш муддатида техноген минерал ҳосилалар ер қаъридан фойдаланувчи томонидан мулкий улуш сифатида янги корхонанинг устав фондига берилган тақдирда, улардан фойдаланиш (қайта ишлаш) учун ер қаъри участкасидан фойдаланиш ҳуқуқини берадиган рухсатнома "биринчи келган биринчи олади" тамойилига биноан аризаларни тўғридан-тўғри кўриб чиқиш натижасида берилади.

20. Ер қаъри участкасидан фойдаланиш ҳуқуқини берадиган рухсатномалар нодир тош хомашёси намуналарини, палеонтологик қолдиқларни ва бошқа геологик коллекциябоп материалларни тўплашга бериладиган рухсатномалардан ташқари фақат юридик шахсларга берилади.

21. Ер ости иншоотларини қуриш ва улардан фойдаланишга ер қаъри участкасидан фойдаланиш ҳуқуқини берадиган рухсатнома Давлат экологик экспертизаси ва Давлат комиссиясининг фойдаланиш учун бериладиган ер қаъри участкаси бўйича геологик материаллар экспертиза натижаларининг ижобий хулосалари мавжуд бўлганда берилади.

22. Қуйидагилар ер ости иншоотларига кирмайди:

қурилишнинг тегишли лойиҳалари билан белгиланган чуқурликда жойлашган бино ва иншоотларнинг пойдевори ва ер ости қисми;

ер ости алоқа линиялари, электр, газ, иссиқлик ва сув таъминоти ҳамда канализация объектлари;

метрополитен иншоотлари ва бошқа транспорт туннеллари;

магистрал ва кон қувурлари;

нефть ва нефть маҳсулотларини сақлаш учун ерга чуқур жойлаштирилган резервуарлар;

суғориш каналлари;

кимё корхоналарининг ишлаб чиқариш жараёнида фойдаланиладиган хомашё ва материалларни сақлаш учун ерга чуқур жойлаштирилган резервуарлар.

23. Ғорлар ҳамда бошқа ер ости бўшлиқларидан даволаш-соғломлаштириш ёки туристик мақсадларда фойдаланиш мақсадида муҳофаза этиладиган геологик объектларни барпо этиш учун ер қаъри участкаларидан фойдаланиш ҳуқуқини берадиган рухсатнома ушбу объектларга муҳофаза этиладиган геологик объектлар мақоми берилгандан кейин "Муҳофаза этиладиган табиий ҳудудлар тўғрисида"ги Ўзбекистон Республикаси Қонунига мувофиқ берилиши мумкин.

24. Нодир тош хомашёсининг намуналарини, палеонтологик қолдиқларни ва бошқа геологик коллекциябоп материалларни тўплаш мақсадида ер қаъри участкаларидан фойдаланиш учун ер участкаларини ажратиш талаб қилинмайди.

25. Нодир тош хомашёсининг намуналарини, палеонтологик қолдиқларни ва бошқа геологик коллекциябоп материалларни тўплаш учун ер қаъри участкасидан фойдаланиш ҳуқуқини берадиган рухсатнома:

геология, минералогия, палеонтология ва ўлкашунослик музейларининг илмий коллекцияларини бутлаш ва тўлдириш;

таълим муассасаларининг ўқув коллекцияларини бутлаш ва тўлдириш;

илмий-маърифий ва эстетик мақсаддаги хусусий геология ва палеонтология коллекцияларини бутлаш ва тўлдириш учун (таркибида қимматбаҳо тошлар ва металлар мавжуд бўлган намуналардан ташқари) берилиши мумкин.

26. Нодир тош хомашёсининг намуналари, палеонтологик қолдиқлар ва бошқа геологик коллекциябоп материалларнинг тўпланган намуналари юридик ва жисмоний шахсларнинг мулки ҳисобланади ҳамда улар томонидан илмий, маърифий, тижорат, бадиий, ҳунармандчилик ва бошқа мақсадларда фойдаланилиши мумкин.

3-БОБ. ЕР ҚАЪРИ УЧАСТКАЛАРИДАН

ФОЙДАЛАНИШ ШАРТЛАРИ

27. Ер қаъри участкаларидан фойдаланиш рухсатномада ва/ёки алоҳида битимларда назарда тутилган ер қаъри участкаларидан фойдаланиш шартларига мувофиқ амалга оширилади.

28. Ер қаъридан фойдаланиш турларига қараб Ўзбекистон Республикасининг "Ер ости бойликлари тўғрисида"ги ва "Хавфли ишлаб чиқариш объектларининг саноат хавфсизлиги тўғрисида"ги Қонунларида белгиланган талаблар ва шартлар ер қаъри участкаларидан фойдаланишнинг асосий шартларига тегишлидир.

Рухсатнома олиш учун бажарилиши зарур бўлган шартлар рўйхати ваколатли органнинг расмий веб-сайтида жойлаштирилади.

29. Ер қаъридан фойдаланиш мақсадларига қараб ер қаъридан фойдаланиш шартларида қуйидаги қўшимча шартлар:

а) геологик жиҳатдан ўрганиш учун:

ер қаърини геологик жиҳатдан ўрганиш бўйича йириклаштирилган техник-иқтисодий асосларни ишлаб чиқиш ва Давлат геология қўмитасига топшириш муддати;

атроф муҳитга таъсир кўрсатиши тўғрисида ариза лойиҳасига Давлат экология қўмитаси томонидан бериладиган ижобий давлат экологик экспертиза хулосасини Давлат геология қўмитасига топшириш муддати;

ер қаърини геологик жиҳатдан ўрганиш учун йиллик энг кам харажатлар бўйича мажбуриятлар миқдори, шу жумладан Давлат геология қўмитасига ер қаъри участкасидан фойдаланиш учун йириклаштирилган техник-иқтисодий асосларни тақдим этган кундан бошлаб икки йил мобайнида бажариладиган минимал инвестиция мажбуриятлари;

Кон-геология фаолиятини назорат қилиш инспекциясига тўқсон кун мобайнида ер қаъридан фойдаланиш бўйича лойиҳаларини тақдим этиш мажбурияти;

фойдали қазилмаларни геологик жиҳатдан ўрганиш бўйича минимал иш ҳажми, уларни амалга ошириш муддатлари;

олинган геологик ва бошқа маълумотларни ҳисобга олиш, сақлаш ва тизимлаштириш учун Давлат геология қўмитасига топшириш тартиби ва муддатлари;

фойдали қазилмаларни, шу жумладан, углеводородларни, саноатда фойдаланиладиган ер ости сувларини тажриба (намуна) учун ва тажриба-саноат усулида кавлаб олиш шартлари;

геологик материалларни давлат экспертизасидан ўтказиш ва фойдали қазилмалар захираларини тасдиқлаш учун материалларни Давлат комиссиясига тақдим этиш тартиби ва муддатлари;

кон ишланмалари ва қудуқларини аҳоли ҳаёти ва соғлиги, атроф муҳит хавфсизлигини таъминлайдиган ҳолатга келтириш, шунингдек, фойдаланилмайдиган кон ишланмалари ва қудуқларини тугатиш тартиби;

ер қаъридан фойдаланиш соҳасида, хавфли ишлар, ишлаб чиқариш, хавфли товарлар ва моддалар айланмаси, портловчи моддаларга Ўзбекистон Республикаси Саноат хавфсизлиги давлат қўмитасида рухсат бериш жараёнларидан ўтиш тартиби;

углеводородлар, портловчи ва кимёвий моддалар, қимматбаҳо металлар ва қимматбаҳо тошларнинг муомаласи соҳасидаги қонунчилик талабларига риоя этиш шартлари;

фойдали қазилмаларни кавлаб олишда фойдаланиладиган ишлар ва хизматларда маҳаллий