Озодликдан маҳрум этиш жазосини ўтаб бўлган фуқароларнинг ижтимоий мослашувига кўмаклашиш бўйича "дастлабки ижтимоий-моддий ёрдам пакети"ни бериш тартиби тўғрисидаги Низом (ЎзР Президентининг 29.06.2022 й. ПҚ-299-сон қарорига 1-илова)

Функция недоступна

Ўзбекистон Республикаси

Президентининг

2022 йил 29 июндаги

ПҚ-299-сон қарорига

1-ИЛОВА

Озодликдан маҳрум этиш жазосини ўтаб бўлган

фуқароларнинг ижтимоий мослашувига кўмаклашиш

бўйича "дастлабки ижтимоий-моддий ёрдам пакети"ни

бериш тартиби тўғрисидаги

НИЗОМ

1-БОБ. УМУМИЙ ҚОИДАЛАР

1. Мазкур Низом озодликдан маҳрум этиш жазосини ўтаб бўлган фуқароларнинг (кейинги ўринларда - кўмак олувчилар) ижтимоий мослашувига кўмаклашиш бўйича "дастлабки ижтимоий-моддий ёрдам пакети"ни (кейинги ўринларда - ёрдам пули) бериш тартибини белгилайди.

2. Ёрдам пулиҳар бир кўмак олувчига унинг ижтимоий мослашувига кўмаклашиш учун тадбиркорлик, меъморчилик, ҳунармандчилик каби йўналишлардаги лойиҳаларини амалга оширишни молиялаштириш мақсадида бир марта берилади.

3. Ёрдам пули меҳнатга ҳақ тўлашнинг энг кам миқдорининг ўн баравари миқдорида берилади.

4. Ёрдам пули:

2022 йилда - туман (шаҳар) бюджетлари қўшимча маблағлари ҳисобидан, етишмаган қисми бўйича эса - Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари қўшимча маблағлари ҳисобидан ажратилади;

2023 йил ва кейинги йиллар учун - туман (шаҳар) бюджетлари маблағлари ҳисобидан, етишмаган қисми бўйича эса - Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари маблағлари ҳисобидан ажратилади.

5. Ёрдам пули "Ижтимоий ҳимоя ягона реестри" ахборот тизими орқали мазкур Низомга 1-иловага мувофиқ схема бўйича берилади.

6. Кўмак олувчиларга ёрдам пуллари туман (шаҳар) ҳокимлари раҳбарлигида ташкил этилган Озодликдан маҳрум этиш жазосини ўтаб бўлган фуқароларнинг ижтимоий мослашувига кўмаклашиш бўйича "дастлабки ижтимоий-моддий ёрдам пакети"ни бериш масаласини кўриб чиқувчи идоралараро доимий комиссияларнинг (кейинги ўринларда - Идоралараро комиссиялар) қарорлари асосида берилади.

2-БОБ. ИДОРАЛАРАРО КОМИССИЯЛАР

ҚАРОРЛАРИНИ ҚАБУЛ ҚИЛИШ ВА УЛАРНИНГ

БАЖАРИЛИШИНИ ТАЪМИНЛАШ

7. Туман (шаҳар) ҳокими Идоралараро комиссияга раислик қилади ва Идоралараро комиссия томонидан қабул қилинган қарорларни тасдиқлайди.

8. Идоралараро комиссия раиси бўлмаганда ёки унинг топшириғига кўра Идоралараро комиссия йиғилишларига туман (шаҳар) ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари раислик қилади.

9. Ички ишлар органлари пробация хизмати Идоралараро комиссиянинг ишчи органи (кейинги ўринларда - ишчи орган) ҳисобланади.

Ишчи орган:

Идоралараро комиссия йиғилишлари кун тартибига киритиладиган масалаларни тайёрлайди, йиғилиш баённомасини юритади ва расмийлаштиради;

Идоралараро комиссия аъзоларига Идоралараро комиссия йиғилиши ўтказиладиган сана ва жой тўғрисида хабар беради;

кўмак олувчиларнинг аризалари билан ишлайди ва уларни кўриб чиқиш учун Идоралараро комиссияга тақдим этади.

10. Идоралараро комиссия қарорлари унинг йиғилишида (сайёр йиғилишида) иштирок этадиган аъзоларининг кўпчилик овозибилан қабул қилинади. Овозлар тенг бўлганда, раиснинг овози ҳал қилувчи ҳисобланади.

Идоралараро комиссиянинг ҳар бир аъзоси қабул қилинаётган қарор юзасидан ўз фикрини ёзма равишда билдиришга ҳақли.

11. Қарорларни тезкор қабул қилиш мақсадида Идоралараро комиссия раиси алоҳида масалалар юзасидан Идоралараро комиссия аъзолари ўртасида сўровнома ўтказиш орқали қарор қабул қилиш ҳуқуқига эга.

12. Идоралараро комиссия йиғилишларида (сайёр йиғилишида) баённома юритилади.

Идоралараро комиссия йиғилишларида қабул қилинган қарорлар ушбу Низомга 2-иловага мувофиқ шаклда хулоса билан расмийлаштирилади ва раис томонидан тасдиқланади.

13. Идоралараро комиссия томонидан қабул қилинган қарордан норози бўлган унинг аъзоси тегишли қарор қабул қилинган куннинг ўзида таклиф ёки фикрларини ёзма равишда ишчи органга тақдим этишга ҳақли.

14. Идоралараро комиссия қарорларининг бажарилиши Идоралараро комиссия раиси томонидан назорат қилинади.

3-БОБ. ЁРДАМ ПУЛИНИ БЕРИШ

15. Кўмак олувчилар жазони ўтаб бўлганидан кейин уч ой муддатда ўз хоҳишига кўра ишчи органга ўзининг тадбиркорлик, меъморчилик ёки ҳунармандчилик каби йўналишлардаги аниқ лойиҳасини илова қилган ҳолда ушбу Низомга 3-иловага мувофиқ шаклда ариза тақдим этади.

Ишчи органга лойиҳа билан биргаликда ёрдам пулини олиш йўналиши, қайси мақсадларда сарфланиши ҳамда лойиҳа натижаси бўйича кутилаётган тахминий даромад ҳақида маълумот ҳам тақдим этилади.

16. Ишчи орган уч иш куни мобайнида аризани Идоралараро комиссияга киритади.

Идоралараро комиссия томонидан ўн иш куни мобайнида ариза ўрганиб чиқилади, кўмак олувчилар тақдим этган лойиҳани молиялаштириш мақсадга мувофиқ ёки мувофиқ эмаслиги юзасидан хулоса тайёрланади ҳамда ариза тасдиқланади.

17. Кўмак олувчиларнинг лойиҳасини молиялаштириш мақсадга мувофиқлиги юзасидан хулосани тайёрлаш қуйидаги мезонларга асосланади:

бошламоқчи бўлган тадбиркорлик, меъморчилик ёки ҳунармандчилик фаолиятининг натижадорлиги ва даромадли эканлиги;

маҳалла фуқаролар йиғинининг ижобий тавсияси;

кам таъминланган ёки ёлғизлиги;

қарамоғида ногиронлиги бўлган ёки вояга етмаган фарзанди борлиги;

кўп (4 ва ундан ортиқ) фарзанди борлиги ва моддий кўмакка муҳтожлиги;

нотурар жойларда истиқомат қилаётганлиги.

Идоралараро комиссия кўмак олувчиларнинг лойиҳасини ушбу мезонларга қатъий риоя этган ҳолда холисона баҳолайди.

18. Идоралараро комиссия кўмак олувчилар лойиҳасини молиялаштириш мақсадга мувофиқ эмаслиги юзасидан хулосага келганда, кўмак олувчиларга тақдим этилган лойиҳани такомиллаштириш ёки янги лойиҳа тақдим этиш бўйича тавсиялар беради.

19. Кўмак олувчилар уч ой муддатда Идоралараро комиссиянинг тавсиялари асосида дастлабки тақдим этилган лойиҳани такомиллаштирган ҳолда ёки янги лойиҳани тақдим этиши мумкин.

Бунда, қайта тақдим этилган лойиҳаларга ушбу Низомнинг 15-17-бандлари татбиқ этилади.

20. Идоралараро комиссиянинг кўмак олувчилар тақдим этган лойиҳани молиялаштириш юзасидан киритган хулосаси Идоралараро комиссия раиси томонидан тасдиқлангандан сўнг ишчи орган бир иш куни мобайнида "Ижтимоий ҳимоя ягона реестри" ахборот тизимига тегишли маълумотларни киритади ва хулосани туман (шаҳар) ҳокимликларининг молия бўлимларига юборади.

21. "Ижтимоий ҳимоя ягона реестри" ахборот тизимига тегишли маълумотлар киритилгандан сўнг уч иш куни мобайнида мазкур тизим орқали кўмак олувчиларнинг мобил телефон рақамига ёки электрон почта манзилига ёрдам пули ажратилганлиги тўғрисида хабар юборилади.

Ёрдам пулини бериш бўйича электрон тўлов қайдномалари тизимда автоматик равишда шакллантирилади ва АТ "Халқ банки" туман (шаҳар) бўлимига (филиалига) юборилади.

22. Туман (шаҳар) ҳокимликларининг молия бўлимлари уч иш куни мобайнида ёрдам пулини бериш учун тегишли маблағларни АТ "Халқ банки"нинг туман (шаҳар) бўлими (филиали) махсус ҳисобварағига ҳар ойнинг 5-санасига қадар ўтказиб боради.

23. АТ "Халқ банки" туман (шаҳар) бўлими (филиали) бир ой муддатда:

кўмак олувчиларга ёрдам пулини тўлайди;

ёрдам пули тўланганлиги тўғрисида Идоралараро комиссияга маълумот тақдим этади;

тўланмаган маблағларни тегишлилигига кўра туман (шаҳар) бюджети ёки Қорақалпоғистон Республикаси бюджети, вилоятлар ва Тошкент шаҳар маҳаллий бюджетларига қайтаради ҳамда тегишли молия бўлимларига электрон маълумот тақдим этади.

АТ "Халқ банки"га Молия вазирлиги билан тузилган шартномага асосан кўмак олувчиларга бериладиган ёрдам пулининг бир фоизи миқдорида банк хизмат ҳақини тўлаб беради.

24. Ишчи орган ёрдам пули берилган вақтдан бошлаб бир йил давомида кўмак олувчилар лойиҳасининг амалга оширилиш ҳолатини (шу жумладан, ёрдам пулининг мақсадли сарфланишини) ҳар чоракда бир марта мониторинг қилади, мониторинг натижаси бўйича маълумотнома тайёрлайди ҳамда уни Идоралараро комиссияга киритади.

4-БОБ. ЯКУНЛОВЧИ ҚОИДАЛАР

25. Кўмак олувчиларга ёрдам пулини бериш учун ажратилган маблағларнинг мақсадли фойдаланилиши қонунчилик ҳужжатларида белгиланган тартибда назорат қилинади.

26. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ жавобгар бўлади.

Низомга

1-ИЛОВА

Озодликдан маҳрум этиш жазосини ўтаб

бўлган фуқароларнинг ижтимоий мослашувига

кўмаклашиш бўйича "дастлабки ижтимоий-моддий

ёрдам пакети"ни бериш

СХЕМАСИ

         

Низомга

2-ИЛОВА

Озодликдан маҳрум этиш жазосини ўтаб бўлган

фуқароларнинг ижтимоий мослашувига кўмаклашиш

юзасидан уларнинг тадбиркорлик, меъморчилик ёки

ҳунармандчилик каби йўналишлардаги лойиҳаларини

ўрганиш натижалари бўйича

ХУЛОСА

"дастлабки ижтимоий-моддий ёрдам пакети"ни олиш бўйича _______ йил ________даги аризаси ва ижтимоий мослашувига кўмаклашиш юзасидан тадбиркорлик, меъморчилик ёки ҳунармандчилик каби йўналишлардаги лойиҳасини Идоралараро комиссия томонидан ўрганиш натижаларига кўра қуйидагилар аниқланди:

ХУЛОСА

1. Фуқаро _____________________нинг лойиҳасини молиялаштириш мақсадга мувофиқ / мувофиқ эмас.

2. Фуқаро _____________________га уч ой ичида Идоралараро комиссия тавсиялари асосида дастлабки тақдим этилган лойиҳани такомиллаштирган ҳолда ёки янги лойиҳани тақдим этиши мумкинлиги тушунтирилсин.

             

Низомга

3-ИЛОВА

"Дастлабки ижтимоий-моддий ёрдам пакети"ни олиш учун

АРИЗА

2. Ушбу билан менга Ўзбекистон Республикаси Президентининг 2022 йил 29 июндаги ПҚ-299-сон қарорига мувофиқ озодликдан маҳрум этиш жазосини ўтаб бўлган фуқароларнинг ижтимоий мослашувига кўмаклашиш бўйича "дастлабки ижтимоий-моддий ёрдам пакети"ни олишда амалий ёрдам беришингизни сўрайман.

3. Аризага тадбиркорлик, меъморчилик ёки ҳунармандчилик каби йўналишлардаги лойиҳа илова қилинади.

Илова: "____" варақда.

Тўлдирилган сана __________________________________

Ариза берувчининг имзоси __________________________________

Қонун ҳужжатлари маълумотлари миллий базаси (www.lex.uz),

2022 йил 30 июнь