Ички ишлар органларида хизматга номзодларни танлаб олиш тадбирларини ташкил этиш ва ўтказиш тартиби тўғрисидаги Йўриқнома (АВ томонидан 06.12.2023 й. 3481-сон билан рўйхатга олинган ички ишлар вазирининг 02.11.2023 й. 601-сон буйруғи билан тасдиқланган)

Функция недоступна

Ўзбекистон Республикаси

Адлия вазирлигида

2023 йил 6 декабрда 3481-сон

билан рўйхатга олинган

Ўзбекистон Республикаси

ички ишлар вазирининг

2023 йил 2 ноябрдаги

601-сон буйруғига

ИЛОВА

Ички ишлар органларида хизматга номзодларни

танлаб олиш тадбирларини ташкил этиш

ва ўтказиш тартиби тўғрисидаги

ЙЎРИҚНОМА

Мазкур Йўриқнома ички ишлар органларида хизматга (бундан буён матнда хизмат деб юритилади) номзодларни танлаб олиш тадбирларини (бундан буён матнда танлов деб юритилади) ташкил этиш ва ўтказиш тартибини белгилайди.

1-БОБ. УМУМИЙ ҚОИДАЛАР

1. Номзодлар хизматга ихтиёрий тартибда, ички ишлар органларидаги мавжуд бўш лавозимлардан келиб чиққан ҳолда ички ишлар органлари томонидан танлов асосида қабул қилинади.

Танловда иштирок этадиган номзодларнинг сони чекланмайди.

2. Номзодларга қўйиладиган умумий талаблар ҳамда танловдан муваффақиятли ўтган номзодларни хизматга қабул қилиш тартиби Ўзбекистон Республикаси Президентининг 2017 йил 29 ноябрдаги ПҚ-3413-сон қарори билан тасдиқланган Ички ишлар органларида хизматни ўташ тартиби тўғрисидаги низомга (бундан буён матнда Низом деб юритилади) мувофиқ амалга оширилади.

3. Низомга асосан:

а) хизмат мажбуриятларини бажариш чоғида ҳалок бўлган ички ишлар органлари ходимлари ва ҳарбий хизматчиларнинг фарзандлари танловнинг саралаш босқичидаги дастлабки ўрганиш ҳамда интеллектуал ривожланганлик даражаси ва психоэмоционал барқарорлигини баҳолаш босқичларидан муваффақиятли ўтган тақдирда, тест синовидан озод этилган ҳолда жисмоний тайёргарлик даражасини баҳолаш босқичига ўтказилади.

б) мазкур Йўриқноманинг 1-иловасида келтирилган рўйхатга мувофиқ ички ишлар органларининг тор ихтисослик бўйича мутахассисликлар талаб этиладиган айрим лавозимларига тегишли тор ихтисослик бўйича мутахассисликка эга бўлган номзодлар танловнинг саралаш босқичисиз, фақат ўрганиш босқичи орқали хизматга қабул қилинади;

в) мазкур Йўриқноманинг 2-иловасида келтирилган рўйхатга мувофиқ ички ишлар органларининг алоҳида мутахассислик талаб этиладиган лавозимларига ушбу мутахассисликка эга бўлган номзодларгина танлов асосида (бундан мазкур Йўриқноманинг 1-иловасидаги рўйхатга мувофиқ тор ихтисослик бўйича мутахассисликлар талаб этиладиган лавозимлар учун номзодлар мустасно) қабул қилинади;

г) мазкур Йўриқноманинг 3-иловасида келтирилган рўйхатга мувофиқ ички ишлар органларининг айрим бўлинмалари ва лавозимларига ўттиз ёшдан катта бўлган фуқаролар қабул қилиниши мумкин;

д) қуйидаги номзодлар, истисно тариқасида, танлов тадбирларининг саралаш босқичидаги тест синови ва жисмоний тайёргарлик даражасини баҳолашдан озод қилинади:

илмий даража ёки илмий унвонга эга бўлган номзодлар;

олий таълим муассасаларини имтиёзли диплом билан тамомлаганлар;

профессор-ўқитувчи ва илмий таркиб лавозимларига номзодлар;

эксперт-криминалистика, иш юритиш, киберхавфсизлик, ахборот технологиялари, таҳлилий ва юридик таъминлаш бўлинмаларига номзодлар;

спорт мусобақаларининг (Олимпия спорт турлари бўйича Олимпия ва Осиё ўйинлари, жаҳон ва Осиё чемпионатларида охирги тўрт йилда ҳамда республика чемпионатларида охирги бир йилда ғолиб ва совриндор (1 - 3 ўрин) индивидуал турларида ғолиб чиққан номзодлар;

талабалар, магистрлар ёки докторантлар учун Ўзбекистон Республикаси Президентининг давлат стипендияси соҳиби бўлган номзодлар.

4. Ўзбекистон Республикаси Вазирлар Маҳкамасининг 2022 йил 15 январдаги 23-сон қарори билан тасдиқланган Аҳолининг жисмоний тайёргарлик даражасини баҳолаш бўйича спорт синовларини ташкил этиш ва ўтказиш тартиби тўғрисидаги низомга асосан, ёш кўрсаткичларидан келиб чиқиб, аҳолининг жисмоний тайёргарлик даражасини баҳолаш бўйича спорт синовларининг махсус талабларини муваффақиятли бажарган (1, 2 ва 3-ўрин ғолиблари) фуқаролар бир йил мобайнида танловнинг жисмоний тайёргарлик даражасини баҳолаш босқичидан озод қилинади ҳамда уларга ушбу босқич бўйича максимал баҳо берилади.

5. Хизматга қабул қилишда номзодлар бўйининг баландлиги қуйидаги махсус антропометрик параметрларга жавоб бериши талаб этилади (бундан мазкур банднинг тўртинчи хатбошисида назарда тутилган лавозимлар бўйича номзодлар мустасно):

эркак жинсидаги номзодларнинг бўйи - 165 сантиметрдан паст бўлмаслиги керак;

аёл жинсидаги номзодларнинг бўйи - 160 сантиметрдан паст бўлмаслиги керак.

Мазкур Йўриқноманинг 4-иловасида келтирилган рўйхатга мувофиқ Ўзбекистон Республикаси Ички ишлар вазирлиги (бундан баён матнда Ички ишлар вазирлиги деб юритилади) Жамоат хавфсизлиги департаменти Йўл ҳаракати хавфсизлиги хизмати ва Жамоат тартибини сақлаш бўлинмаларининг айрим лавозимларига номзодлар бўйининг баландлиги алоҳида антропометрик параметрларга жавоб бериши талаб этилади.

6. Танлов тадбирларининг исталган битта босқичидан ўта олмаган номзодга уни такроран топширишга, шунингдек танлов тадбирларининг кейинги босқичига ўтишга рухсат берилмайди.

7. Танлов тадбирлари давомида фахрийлар кенгаши аъзолари, жамоат ташкилотлари вакиллари ва номзодларнинг яқин қариндошлари (бундан буён матнда жамоатчилик вакиллари деб юритилади) иштирок этишлари мумкин.

Бунда, жамоатчилик вакиллари саралаш тадбирларини ўтказиш жараёни ва унинг натижаларидан норози бўлган тақдирда танловнинг тегишли комиссияси раисига ёзма равишда мурожаат қилишлари ва ўз таклиф ҳамда эътирозларини билдиришлари мумкин. Жамоатчилик вакилларининг мурожаатлари Ўзбекистон Республикасининг "Жисмоний ва юридик шахсларнинг мурожаатлари тўғрисида"ги Қонунида белгиланган тартибда кўриб чиқилиши лозим.

2-БОБ. ТАНЛОВ ТАДБИРЛАРИНИ ТАШКИЛЛАШТИРИШ

    

8. Хизматга муносиб номзодларни танлаб олиш мақсадида мунтазам равишда тарғибот-ташвиқот ишлари олиб борилади, оммавий ахборот воситаларида ҳамда ички ишлар органларининг расмий нашрлари, веб-сайтларида бўш лавозимлар тўғрисида, шунингдек танлов ўтказилишидан камида уч ой олдин танлов ўтказиш жойи ва кунлари тўғрисида эълонлар жойлаштирилади.

9. Жамоатчилик вакиллари танловларни реал вақт режимида (онлайн) кузатиб боришлари учун танлов тадбирлари видеокузатув (онлайн трансляция) остида ўтказилади.

10. Танловни ташкил этиш ва ўтказиш учун Ички ишлар вазирлигининг тегишли таркибий тузилмалари, Қорақалпоғистон Республикаси ички ишлар вазири, Тошкент шаҳар ва Тошкент вилояти ички ишлар бош бошқармалари ва вилоятлар ички ишлар бошқармалари бошлиқлари (бундан буён матнда ички ишлар органлари бошлиқлари деб юритилади) буйруғи билан мазкур Йўриқноманинг 5-иловасига мувофиқ таркибда, аъзолари сони тоқ сондан иборат бўлган Танлов тадбирларини ташкил этиш ва ўтказиш комиссиялари (бундан буён матнда Қабул комиссияси деб юритилади) тузилади.

Танловлар шаффоф ва ошкора тарзда ўтказилишини таъминлаш ҳамда жамоатчилик назоратини ўрнатиш мақсадида Қабул комиссияси фаолиятида иштирок этиш учун ихтиёрийлик асосида жамоатчилик вакиллари таклиф этилиши мумкин.

11. Ички ишлар органлари бошлиқларининг маънавий-маърифий ишлар ва кадрлар билан таъминлаш бўйича тегишли ўринбосарлари Қабул комиссиялари фаолиятига раҳбарлик қилади ва қуйидагиларни амалга оширади:

Қабул комиссияси ишини ташкиллаштиради ҳамда унга юклатилган вазифа ва функцияларнинг бажарилишини таъминлайди;

Қабул комиссияси аъзолари ўртасида вазифаларни тақсимлайди ҳамда уларнинг бажарилишини назорат қилади;

Қабул комиссияси таркибидаги кичик комиссияларни шакллантиради ва таркибини тасдиқлайди;

кичик комиссиялар фаолиятини мувофиқлаштиради ва назорат қилади;

танловларни видеокузатув қурилмалари орқали реал вақт режимида (онлайн) кузатиб бориш имконияти яратилишини ташкиллаштиради.

12. Қабул комиссияси таркибида қуйидаги йўналишлар бўйича кичик комиссиялар тузилади:

тегишли соҳавий хизмат раҳбарлари ҳамда кадрлар билан таъминлаш бўлинмаси раҳбар ва ходимларидан иборат таркибда тузиладиган номзодларни дастлабки ўрганиш бўйича кичик комиссия;

касбий тайёргарлик, шахсий хавфсизлик, тиббиёт бўлинмалари, Ёшлар иттифоқи бошланғич ташкилоти етакчилари ва соҳавий хизмат ходимларидан иборат таркибда тузиладиган жисмоний тайёргарлик даражасини баҳолаш бўйича кичик комиссия;

мутахассис-психолог-полиграфологлар ва бевосита уларнинг бошлиқларидан иборат таркибда тузиладиган интеллектуал ривожланганлик даражаси ва психоэмоционал барқарорликни баҳолаш ҳамда психофизиологик (полиграф) текширув бўйича кичик комиссиялар.

13. Танловлар номзоднинг хоҳишига кўра, давлат, қорақалпоқ ёки рус тилларида ўтказилади.

14. Танлов тадбирлари қуйидаги босқичларни ўз ичига олади:

а) саралаш босқичи:

рўйхатдан ўтиш;

дастлабки ўрганиш (Низом ва мазкур Йўриқномада белгиланган талабларга мос келишни текшириш);

интеллектуал ривожланганлик даражаси ва психоэмоционал барқарорлигини баҳолаш (бундан буён матнда психологик ўрганиш деб юритилади);

тест синови (Ўзбекистоннинг энг янги тарихи, ҳуқуқшунослик ва тарбия фанлари бўйича билимларни баҳолаш);

жисмоний тайёргарлик даражасини баҳолаш;

б) ўрганиш босқичи:

хизматга яроқлилик даражасини аниқлаш мақсадида ҳарбий-тиббий комиссия кўригидан ўтказиш;

психофизиологик (полиграф) текширув (ички ишлар органларида хизмат қилиш учун тўсқинлик қиладиган салбий омилларни аниқлаш мақсадида).

3-БОБ. ТАНЛОВНИНГ САРАЛАШ БОСҚИЧИДА

ИШТИРОК ЭТИШ УЧУН РЎЙХАТДАН ЎТИШ

15. Танлов тўғрисида эълонлар берилгандан сўнг, хизматга кириш истагини билдирган номзодлар доимий яшаш жойи бўйича рўйхатга олинган жойидаги ички ишлар органининг расмий веб-сайти (бундан буён матнда веб-сайт деб юритилади) орқали рўйхатдан ўтади.

Бунда, номзодлар веб-сайтга ўзининг паспорт ёки идентификация ID-картаси маълумотларини киритади.

Ички ишлар вазирлиги марказий аппарати ва олий таълим муассасаларига (Ички ишлар вазирлиги Академияси ва Малака ошириш институтига), шунингдек Тошкент шаҳар Ички ишлар бош бошқармасига хизматга кириш истаги бўлган номзодлар, доимий яшаш жойи бўйича рўйхатга олинган жойидан қатъий назар, тегишлилигига кўра, Ички ишлар вазирлиги марказий аппарати, олий таълим муассасалари (Ички ишлар вазирлиги Академияси ва Малака ошириш институти) ёки Тошкент шаҳар Ички ишлар бош бошқармасининг расмий веб-сайтлари орқали рўйхатдан ўтишлари мумкин.

16. Рўйхатдан ўтиш жараёнида номзодларга веб-сайт орқали Низом ва мазкур Йўриқномада белгиланган талаблар эслатиб ўтилади.

17. Рўйхатдан ўтган номзодларга навбатдаги танлов тадбирлари бошланишидан беш иш куни олдин тегишли ички ишлар органлари томонидан саралаш тадбирларининг бошланиш вақти ва жойи ҳақида ёзма ёки электрон шаклда хабар берилади.

4-БОБ. НОМЗОДЛАРНИ ДАСТЛАБКИ ЎРГАНИШ

18. Рўйхатдан ўтган ва дастлабки ўрганиш учун ҳозир бўлган номзодларнинг Низомда белгиланган умумий талаблар ва мазкур Йўриқноманинг 5-бандида назарда тутилган талабларга жавоб беришини аниқлаш мақсадида дастлабки ўрганиш бўйича кичик комиссия (бундан буён мазкур бобда кичик комиссия деб юритилади) томонидан номзодларни дастлабки ўрганиш ишлари амалга оширилади ҳамда уларнинг бўйи ўлчанади.

19. Номзоднинг бўйи талабга жавоб бермаган ҳолларда, унга дастлабки ўрганиш тадбирларида иштирок этишга рухсат берилмайди.

20. Дастлабки ўрганиш давомида Низом ва мазкур Йўриқномада белгиланган талабларга мос деб топилган номзодлар шу вақтнинг ўзида суҳбатдан ўтказилади.

21. Суҳбат кичик комиссиянинг суҳбат ўтказилишига масъул бўлган аъзоси (аъзолари) томонидан номзодга Низом ва мазкур Йўриқнома талаблари, унинг ҳуқуқ ва мажбуриятлари, хизматни ўташ билан боғлиқ шартлар ва имтиёзлар, хизматнинг зарарли ва хавфли жиҳатларини тушунтириш ҳамда номзоднинг хизматга кириш истаги бор ёки йўқлигини аниқлаш мақсадида ўтказилади.

22. Кичик комиссия томонидан номзодни дастлабки ўрганиш босқичида ўтказилган тадбирлар натижалари умумлаштирилиб, шу куннинг ўзида номзодни танловнинг кейинги босқичига ўтказиш ёки ўтказишни рад этиш ҳақида хулоса чиқарилади.

Бунда, номзоднинг бўйи талабга жавоб берганда ҳамда номзод хизматга кириш истагини билдирган ҳолларда, шунингдек номзод Низомда белгиланган талабларга жавоб берганда кичик комиссия томонидан номзодни кейинги босқичга ўтказиш тўғрисида қарор қабул қилиниши керак.

5-БОБ. НОМЗОДЛАРНИНГ ИНТЕЛЛЕКТУАЛ

РИВОЖЛАНГАНЛИК ДАРАЖАСИ ВА ПСИХОЭМОЦИОНАЛ

БАРҚАРОРЛИГИНИ БАҲОЛАШ

23. Танловнинг дастлабки ўрганиш босқичидан муваффақиятли ўтган номзодларнинг интеллектуал ривожланганлик даражаси ва психоэмоционал барқарорлигини аниқлаш мақсадида психологик ўрганиш ўтказилади.

24. Номзодларни психологик ўрганиш психологик тест синовидан ўтказиш орқали амалга оширилади.

25. Психологик тестлар, уларнинг жавоблари ва жавоблар бланкалари Ўзбекистон Республикаси ички ишлар вазири ёки унинг ўринбосари томонидан тасдиқланади.

Психологик тестлар номзодларнинг қуйидаги психологик хусусиятларини аниқлашга йўналтирилади:

ақл-заковат, умумий интеллектуал салоҳият ва хотира;

мантиқий фикрлаш, зийраклик, тафаккур шаклларининг ривожланганлик даражаси, фикрлаш тезлиги ва таҳлил қилиш қобилияти;

шахсга хос индивидуал хусусиятлар, киришимлилик, психик турғунлик, самимийлик.

26. Психологик тестлар ва уларнинг жавоблари Қабул комиссияси котибида сақланади, котиб тестлар ва уларнинг жавоблари ошкор қилинмаслиги учун масъул ҳисобланади.

27. Психологик ўрганиш бошланишидан аввал номзодлар интеллектуал ривожланганлик даражаси ва психоэмоционал барқарорликни баҳолаш бўйича кичик комиссия (бундан буён мазкур бобда кичик комиссия деб юритилади) аъзолари томонидан психологик ўрганишни ўтказиш тартиби, ҳар бир вазифа бўйича назарда тутилган баҳолаш мезонлари билан таништирилади.

28. Номзодлар психологик ўрганиш ўтказиладиган хонага ўзининг биометрик паспорти ёки идентификация ID-картасини кўрсатган ҳолда киритилади.

29. Тест синовлари ўтказилаётган хонага жадвал, китоб, уяли телефон, компьютер, калькулятор ҳамда бошқа телекоммуникация воситалари ва шпаргалкалар олиб кириш тақиқланади.

30. Номзодлар барча ҳаракатларни комиссия аъзолари кўрсатмаларига мувофиқ бажаради. Мазкур кўрсатмаларга амал қилмаган номзод хонадан чиқариб юборилади ҳамда у тест синовларини бажармаган ҳисобланади. Бунда, номзодга тест синовларини такроран топширишига, шунингдек танлов тадбирларининг кейинги босқичига ўтишига рухсат берилмайди.

31. Номзодлар билан тест синовлари якка тартибда ёки гуруҳ бўлиб ўтказилиши мумкин. Тест гуруҳ таркибида ўтказилганда, хонада номзодлар сони 30 нафардан ошмаслиги зарур.

32. Тест бошлангунга қадар номзодлар соғлиғининг ҳолати суриштирилади. Ўзини ёмон ҳис қилаётганидан шикоят қилган номзодлар шу куни тест синовига қўйилмайди. Бундай ҳолларда номзодга бошқа куни, лекин уч иш кунидан кечикмай қайта тест синовидан ўтишига рухсат берилади.

33. Психологик ўрганиш давомида номзодларга икки қисмдан иборат бўлган тест асосида вазифалар берилади.

Бунда, биринчи қисмда (интеллектуал ривожланганлик даражасини ўрганиш) номзодларга 10 та топшириқдан иборат бўлган 2 та вазифа, иккинчи қисмда эса, (психоэмоционал барқарорлик даражасини ўрганиш) 71 та саволдан, шунингдек жавобларнинг самимий ёки носамимийлигини аниқлаш йўналиши бўйича бериладиган 15 та саволдан иборат 1 та вазифа берилади.

34. Номзодга берилган вазифаларни бажариш учун 55 дақиқа, шунингдек ҳар бир вазифани ўқиб чиқиш учун қўшимча 5 дақиқадан - умумий 1 соат 10 дақиқа вақт берилади.

35. Саволларнинг ўзига хослигидан келиб чиқиб, жавоб вариантлари берилиши ёки берилмаслиги мумкин. Номзодлар тест саволларига жавоб вариантларини белгилашда жавоблар варақасидаги вариантлардан фақат битта тўғри жавобни белгилаши лозим.

36. Тест синовларини топшириш вақтида номзоднинг хонадан чиқиши тақиқланади, бундан номзоднинг соғлиғи ёмонлашган ҳолатлар мустасно.

37. Тест синовларини ўтказиш вақтида синовлар ўтказилаётган хонада номзодлар ҳамда кичик комиссия аъзоларидан ташқари бошқа шахсларнинг бўлиши тақиқланади.

38. Номзоднинг психологик тест саволларига берган жавоблари мазкур Йўриқноманинг 6-иловасига мувофиқ психологик тест натижаларини ҳисоблаш мезонлари асосида ҳисоблаб чиқилади.

39. Психологик тестларни бажармаган, шунингдек тест натижалари қониқарсиз баҳоланган номзодларга синовни қайта топширишга рухсат берилмайди.

40. Тест синовининг натижалари бўйича, у ўтказилган куннинг ўзида кичик комиссиянинг психологик ўрганиш тадбирларида иштирок этган аъзолари томонидан мазкур Йўриқноманинг 7-иловасига мувофиқ шаклда қайднома расмийлаштирилади ва имзоланади.

Психологик ўрганишнинг умумий натижалари қайднома расмийлаштирилган куннинг ўзида номзодларга эълон қилиниши лозим.

41. Психологик ўрганиш натижаларига асосан қуйидаги хулосалардан бири чиқарилади:

ички ишлар органларида хизматга тавсия этиш ҳақида;

ички ишлар органларида хизматга тавсия этмаслик ҳақида.

42. Психологик ўрганиш натижаларига кўра, ички ишлар органларида хизматга тавсия этилган номзодларгина тест синовига қўйилади.

6-БОБ. ТЕСТ СИНОВИ

43. Ўзбекистоннинг энг янги тарихи, ҳуқуқшунослик ва тарбия фанлари бўйича номзодларнинг билимларини баҳолаш мақсадида тест синови ўтказилади.

Тест синовлари Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги (бундан буён матнда Билим ва малакаларни баҳолаш агентлиги деб юритилади) томонидан ўтказилади.

Интеллектуал ривожланганлик даражаси ва психоэмоционал барқарорликни баҳолаш натижалари асосида тест синовига қўйилган номзодларга тест синови ўтказиладиган жой ва вақт ҳақида ушбу синов ўтказилишидан уч кун олдин Билим ва малакаларни баҳолаш агентлиги томонидан хабар берилади.

Тест синовлари натижаларига кўра тўпланиши мумкин бўлган умумий 189 баллдан камида 134 балл тўплаган номзодлар жисмоний тайёргарлик даражасини баҳолаш босқичига ўтган деб ҳисобланади.

44. Тест топшириқлари китоби ҳар бир фандан 30 та топшириқни ўз ичига олади ва ҳар бир тўғри жавоб учун қуйидагича балл берилади:

ҳуқуқшунослик фани бўйича ҳар бир тўғри жавоб учун - 3,1 балл ва жами - 93 балл;

Ўзбекистоннинг энг янги тарихи бўйича ҳар бир тўғри жавоб учун - 2,1 балл ва жами - 63 балл;

тарбия фани бўйича ҳар бир тўғри жавоб учун - 1,1 балл ва жами - 33 балл.

45. Билим ва малакаларни баҳолаш агентлиги томонидан тақдим этилган тест синовлари натижалари асосида Қабул комиссияси котиби томонидан мазкур Йўриқноманинг 8-иловасига мувофиқ шаклда қайднома расмийлаштирилади.

46. Қайднома Қабул комиссиясининг ҳар бир аъзоси томонидан имзоланиб, тасдиқлаш учун комиссия раисига тақдим этилади ҳамда тегишли ички ишлар органлари томонидан тест синовлари натижалари Билим ва малакаларни баҳолаш агентлиги томонидан тақдим этилган кундан бошлаб, икки иш куни ичида веб-сайтга жойлаштириш орқали номзодларга маълум қилинади.

7-БОБ. НОМЗОДЛАРНИНГ ЖИСМОНИЙ

ТАЙЁРГАРЛИК ДАРАЖАСИНИ БАҲОЛАШ

47. Саралаш босқичининг тест синовидан муваффақиятли ўтган номзодларнинг жисмоний тайёргарлик даражасини аниқлаш мақсадида улар жисмоний тайёргарлик даражасини баҳолашдан ўтказилади.

48. Номзодлар жисмоний тайёргарлик даражасини баҳолаш машқларини бажаришни бошлашидан олдин уларга жисмоний тайёргарлик даражасини баҳолаш бўйича кичик комиссия (бундан буён мазкур бобда кичик комиссия деб юритилади) аъзолари томонидан машқларни бажаришга қўйиладиган талаблар, машқларни бажариш тартиби ҳамда баҳолаш мезонлари тушунтирилади.

49. Номзодларнинг жисмоний тайёргарлик даражасини баҳолаш уларнинг мазкур бобда назарда тутилган машқларни бажаришларини текшириш орқали амалга оширилади.

50. Жисмоний тайёргарлик даражасини баҳолаш тадбири бошланишидан олдин номзод кичик комиссиянинг масъул аъзоларига ўзини биометрик паспорти ёки идентификация ID-картасини кўрсатган ҳолда таништиради.

51. Номзодлар машқларни спорт кийимида бажаришлари тавсия этилади.

52. Номзодлар томонидан бажарилиши лозим бўлган жисмоний тайёргарлик машқлари ва уларни бажаришга қўйиладиган талаблар эркак ва аёл жинсидаги номзодлар учун алоҳида белгиланади.

53. Қуйидагилар эркак жинсидаги номзодлар томонидан бажарилиши лозим бўлган жисмоний тайёргарлик машқлари ҳисобланади:

куч ишлатиш машқи - тўсинда (турникда) тортилиш;

тезликка оид машқ - 100 метрга югуриш;

чидамлиликка оид машқ - 3 000 метрга югуриш.

54. Қуйидагилар аёл жинсидаги номзодлар томонидан бажарилиши лозим бўлган жисмоний тайёргарлик машқлари ҳисобланади:

куч ишлатиш машқи - куч ишлатиш машқлари комплекси;

тезликка оид машқ - 100 метрга югуриш;

чидамлиликка оид машқ - 1000 метрга югуриш.

55. Жисмоний тайёргарлик машқлари қуйидаги кетма-кетликда бажарилади:

биринчи навбатда - куч ишлатиш машқлари;

иккинчи навбатда - тезликка оид машқлар;

учинчи навбатда - чидамлиликка оид машқлар.

56. Жисмоний тайёргарлик машқларини бажариш оралиғида номзодларга дам олиш учун камида 10 дақиқа вақт берилади.

57. 100 метрга югуриш машқи стадионнинг югуриш йўлакчасида ёхуд қаттиқ қопламали текис жойларда юқори ёки қуйи стартдан қуйидагича амалга оширилади:

"Старт" командаси бўйича старт олиш чизиғига яқинлашиш;

"Диққат" командаси бўйича тананинг оғирлигини олдинда турган оёққа ўтказиш, гавда ва бошни олдинга эгиш, қўлларни тирсакка букиш;

"Олға" командаси бўйича югуришни бошлаш.

58. Қуйидагилар тўсинда (турникда) тортилиш машқига қўйиладиган талаблар ҳисобланади:

бош бармоқ тўсин ичкарисидан ушланади, тана бироз ростланади, тизза бўғими тўғриланади, оёқ учлари чўзилади, товонлар бирлаштирилади;

ияк тўсиндан (турникдан) ўтгунга қадар қўллар букилади;

ҳаракат тўлиқ амалга оширилиши билан дастлабки ҳолатга қайтилади (осилиш ҳолати 1-2 сония давом этиши мумкин);

оёқларни 45° гача кўтаришга рухсат этилади.

Ушбу машқни бажаришда оёқларни букиш ва кериш, танани ҳаракатсиз ҳолатда эгиш ҳамда оёқлар билан силтанма ҳаракатлар қилиш тақиқланади.

59. 3000 ва 1000 метрга югуриш машқлари стадионнинг югуриш йўлакчасида ёхуд қаттиқ қопламали текис жойларда, умумий ёки алоҳида старт берилган ҳолда ўтказилади.

Старт ва марра чизиқлари бир жойда белгиланиши мумкин. Бунда, югуриш ҳудудидан чиқиб кетган ёки югуришдан юриш ҳолатига ўтган иштирокчи машқни бажармаган ҳисобланади.

60. Номзод томонидан куч ишлатиш машқлари комплексини бажаришда 1 дақиқа ичида 2 та машқ узлуксиз бажарилиши керак.

Ҳар бир машқни бажариш учун 30 сониядан вақт ажратилади. Биринчи машқни бажариш учун ажратилган 30 сония вақт тугаганлиги эълон қилинганда, номзод дарҳол иккинчи машқни бажаришга киришади.

61. Қуйидагилар биринчи машқни бажаришга қўйиладиган талаблар ҳисобланади:

чалқанча ётилади;

қўллар белда, тиззалар букилмаган ҳолда оёқлар тўпиқ қисмидан бошқа бир шахс ёрдамида босилиб, ушланади;

дастлабки ҳолатдан гавда олдинга кўтарилиб, қўллар оёқ учига текканидан сўнг, дастлабки ҳолатга қайтилади.

Ушбу машқни бажариш вақтида тиззаларни букиш ва оёқларни тепага кўтариш тақиқланади.

62. Қуйидагилар иккинчи машқни бажаришга қўйиладиган талаблар ҳисобланади:

таяниб ётилади, қўллар елка кенглигида тиззалар букилмаган ҳолатда бўлади;

қўллар букилиб ёзилади (бунда, бел ҳамда елка қисмлари биргаликда ва текис тушиб чиқиши шарт);

қўллар букилиб тана ерга нисбатан параллел ҳолатга келтирилганидан сўнг, дастлабки ҳолатга қайтилади.

Ушбу машқни бажариш вақтида қўллар чала букилиб ёзилиши, бел ва елкалар ҳар хил тушиб чиқиши, тиззаларнинг ерга тегиши тақиқланади.

63. Мазкур бобда назарда тутилган машқларни бажариш тартибини бузган номзодга шу машқ бўйича баҳо қўйилмайди.

64. Номзодларнинг жисмоний тайёргарлик даражасини баҳолаш мазкур Йўриқноманинг 9-иловасига мувофиқ амалга оширилади. Бунда, номзодга ҳар бир машқни бажарганлик учун баҳо қўйилади.

65. Жисмоний тайёргарлик даражасини баҳолаш тадбирлари ўтказилган кундан кейинги кундан кечиктирмай унинг натижалари бўйича мазкур Йўриқноманинг 10-иловасига мувофиқ шаклда қайднома расмийлаштирилади ва натижалар номзодларга эълон қилинади.

66. Қайднома кичик комиссиянинг жисмоний тайёргарлик даражасини баҳолаш бўйича тадбирда иштирок этган аъзолари томонидан имзоланади.

67. Жисмоний тайёргарлик даражасини баҳолаш машқларидан фақат "яхши" ва "аъло" баҳо олган номзодлар ўрганиш босқичига ўтказилади.

8-БОБ. НОМЗОДЛАР ҲУЖЖАТЛАРИНИ

РАСМИЙЛАШТИРИШ ВА НОМЗОДЛАРНИНГ

ТИББИЙ ТЕКШИРУВИНИ ЎТКАЗИШ

68. Саралаш босқичидан муваффақиятли ўтган номзодлар доимий яшаш жойи бўйича рўйхатга олинган жойидаги ички ишлар органига мазкур Йўриқноманинг 11-иловасига мувофиқ шаклдаги ариза билан мурожаат этади.

69. Номзодларнинг шахсий ҳужжатлари йиғмажилдларини расмийлаштириш кадрлар билан таъминлаш бўлинмалари томонидан амалга оширилади.

70. Ҳужжатларида камчилик аниқланган номзодга ушбу камчиликни бартараф этиши кадрлар билан таъминлаш бўлинмалари томонидан тушунтирилади.

71. Ҳужжатларни йиғиш жараёни билан бир вақтда номзодларга хизматга яроқлилик даражасини аниқлаш мақсадида кадрлар билан таъминлаш бўлинмалари томонидан ҳарбий-тиббий комиссияга йўлланма берилади.

72. Саралаш босқичидан муваффақиятли ўтган номзодларни тиббий текширувдан ўтказиш Вазирлар Маҳкамасининг 2017 йил 26 сентябрдаги 764-сон қарори билан тасдиқланган Ўзбекистон Республикаси ички ишлар органларида тиббий текширувни ташкил этиш ва ҳарбий-тиббий экспертизани ўтказиш тартиби тўғрисида низомга мувофиқ амалга оширилади.

9-БОБ. НОМЗОДЛАРНИ ПСИХОФИЗИОЛОГИК

(ПОЛИГРАФ) ТЕКШИРУВДАН ЎТКАЗИШ ТАРТИБИ

73. Тиббий текширув натижаларига кўра хизматга яроқли деб топилган номзодлар ички ишлар органларида хизмат қилиш учун тўсқинлик қиладиган салбий омиллар мавжудлигини аниқлаш мақсадида психофизиологик (полиграф) текширувдан (бундан буён матнда полиграф текшируви деб юритилади) ўтказилади.

74. Полиграф текширувини ўтказишда ҳар-хил турдаги стимуллар (саволлар, фотосуратлар) кетма-кетликда тақдим этилганда одам организмидаги физиологик кўрсаткичларни (параметрларни) қайд этишга мўлжалланган психофизиологик қурилма - полиграфдан фойдаланилади.

75. Полиграф текшируви ушбу текширувни ўтказиш ва у бўйича хулоса бериш ҳуқуқига эга масъул шахс - полиграфолог томонидан амалга оширилади.

76. Номзодлар полиграф текшируви ўтказиладиган хонага ўзининг биометрик паспорти ёки идентификация ID-картасини кўрсатган ҳолда киритилади.

77. Полиграф текшируви қуйидаги кетма-кетликда ўтказилади:

а) полиграфолог ва номзод ўртасида психологик алоқа ўрнатиш, полиграф текширувини ўтказиш тартибини, полиграф мосламаларининг (тугмалар) хусусиятларини тушунтириш мақсадида номзод билан текширув олди суҳбат ўтказиш;

б) номзодга полиграфнинг мосламаларини (тугмаларни) ўрнатиш;

в) полиграф текширувини ўтказиш (номзод билан савол-жавоб);

г) текширув якуни бўйича номзод билан қайта суҳбат ўтказиш (номзоднинг фикр-мулоҳазаларини тинглаш);

д) полиграф текшируви натижаси бўйича хулоса тайёрлаш.

78. Қуйидаги ҳолларда полиграф текширувини ўтказиш тўхтатилади:

полиграф текшируви вақтида номзоднинг соғлиғи ёки руҳий ҳолати ёмонлашганда;

номзод ўз хоҳиши билан полиграф текширувини давом эттиришдан бош тортганда.

Бунда, номзод ўз хоҳиши билан полиграф текширувини давом эттиришдан бош тортган ҳолларда унга полиграф текширувини қайта топширишга рухсат берилмайди ва бу ҳақда шу куннинг ўзида номзодга хабар берилади.

79. Полиграф текшируви вақтида номзоднинг соғлиғи ёки руҳий ҳолати ёмонлашганлиги сабабли полиграф текширувини ўтказиш тўхтатилганда, кичик комиссия томонидан номзодга бошқа куни, лекин уч иш кунидан кечикмай полиграф текширувидан ўтиш учун рухсат берилади.

80. Полиграф текшируви ўтказилаётганда хонада номзод ва полиграфологдан бошқа шахслар бўлишига йўл қўйилмайди.

81. Номзодга полиграф мосламалари (тугмалари) ўрнатилгандан сўнг уни хизматга қабул қилинишига тўсқинлик қилувчи маълумотлар бор ёки йўқлигини аниқлаш мақсадида 3 тадан 10 тагача саволлар берилади.

Номзод ҳар бир саволга самимийлик билан "Ҳа" ёки "Йўқ" деб жавоб бериши зарур.

Номзоднинг жавоблари бўйича полиграф мосламаларининг (тугмаларининг) ҳар биридан олинган кўрсатгич (маълумот)лар полиграфолог томонидан уч баллик тизим асосида (0 дан 2 баллгача) алоҳида баҳоланади.

Бунда, полиграфолог томонидан номзоднинг организмидаги реакция таҳлил қилинади ва у қуйидагича баҳоланади:

номзоднинг организмидаги реакция кучли бўлса - 2 балл;

номзоднинг организмидаги реакция ўрта даражада бўлса - 1 балл.

номзоднинг организмидаги реакция аниқланмаса - 0 балл.

82. Полиграфолог томонидан номзодларни полиграф текшируви натижаларига асосан қуйидаги хулосалардан бири чиқарилади:

номзод унга берилган саволлар бўйича ўрта арифметик ҳисобда 80 фоиздан юқори балл тўпласа, уни хизматга қабул қилиш мақсадга мувофиқ эмаслиги тўғрисида;

номзод унга берилган саволлар бўйича ўрта арифметик ҳисобда 80 фоиз ва ундан кам балл тўпласа, уни хизматга қабул қилиш мақсадга мувофиқлиги тўғрисида.

Бунда, ушбу хулоса полиграфолог томонидан психофизиологик (полиграф) текшируви ўтказилган куннинг ўзида тайёрланади ва кадрлар билан таъминлаш бўлинмасига тақдим этилади.

10-БОБ. ХИЗМАТГА ҚАБУЛ ҚИЛИШ ҲАМДА

УЛАРНИНГ АПЕЛЛЯЦИЯ ШИКОЯТЛАРИНИ

КЎРИБ ЧИҚИШ

83. Қабул комиссияси котиби томонидан танлов тадбирлари давомида расмийлаштирилган барча ҳужжатлар (дастлабки ўрганиш варақалари, қайдномалар ва комиссия баённомаларининг нусхалари) ҳамда ҳар бир номзоднинг танлов тадбирларидаги натижалари мазкур Йўриқноманинг 12-иловасига мувофиқ шаклда чоп этилади ва номзоднинг шахсий ҳужжатлар йиғма жилдига бириктириб қўйилади.

Бунда, тегишли ички ишлар органлари томонидан веб-сайтга жойлаштириш орқали танлов натижалари номзодларга маълум қилинади.

84. Танловнинг барча босқичларидан муваффақиятли ўтиб, энг юқори балл тўплаган номзодлар мавжуд бўш лавозимлар сонини ҳисобга олган ҳолда хизматга қабул қилиниб, Ички ишлар вазирлиги Малака ошириш институтида ташкил этиладиган бошланғич касбий тайёргарлик курсларига юборилади.

85. Танловдан ўтмаган номзодлар бўйича танлов тадбирлари давомида расмийлаштирилган барча ҳужжатлар ҳамда танловнинг барча босқичлари акс этган видеотасвир материаллари кадрлар билан таъминлаш бўлинмаларида беш йил муддат давомида сақланади, кейин эса далолатнома асосида йўқ қилинади.

86. Танлов тадбирлари бошланишидан олдин саралаш ва ўрганиш босқичлари натижалари юзасидан номзодларнинг ариза ва шикоятларини кўриб чиқиш учун Қабул комиссияси раисининг буйруғига асосан ички ишлар органларининг камида беш нафар мутахассисларидан иборат таркибда Апелляция комиссияси ташкил этилади.

Саралаш ва ўрганиш босқичларида танлов тадбирларини ўтказишга масъул бўлган шахсларнинг Апелляция комиссияси таркибига киритилишига йўл қўйилмайди.

87. Номзодлар томонидан ариза ва шикоятлар танловнинг тегишли тадбири бўйича натижалар эълон қилинган кундан бошлаб уч иш куни ичида Апелляция комиссиясига ёзма ёки электрон шаклда беришлари мумкин.

88. Апелляция комиссияси апелляция шикоятини, у келиб тушган кундан бошлаб икки ҳафта ичида кўриб чиқади. Номзод апелляцияни кўриб чиқиш жараёнида иштирок этиш ҳуқуқига эга.

Апелляция кўриб чиқиладиган кун ҳақида номзодга уч кун олдин хабар берилади.

89. Апелляция комиссияси унда аъзоларнинг камида учдан икки қисми иштирок этганда ваколатли ҳисобланади. Апелляция комиссиясининг қарори оддий кўпчилик овоз билан қабул қилинади ва мажлисда иштирок этган барча аъзолар томонидан тасдиқланадиган баённома билан расмийлаштирилади.

90. Апелляция комиссияси томонидан апелляция шикоятини кўриб чиқиш давомида номзодга уни қайта баҳолашга қаратилган саволлар берилишига йўл қўйилмайди.

91. Шикоятни кўриб чиқиш натижалари бўйича Апелляция комиссияси томонидан қуйидаги қарорлардан бири қабул қилинади:

дастлабки ва психологик ўрганиш, тест синови, полиграф текширув ҳамда жисмоний тайёргарлик даражасини баҳолаш натижаларини ўзгаришсиз қолдириш;

дастлабки ва психологик ўрганиш, тест синови, полиграф текширув ҳамда жисмоний тайёргарлик даражасини баҳолаш натижаларига ўзгартириш киритиш.

Апелляция шикоятини кўришда номзоднинг синов натижасида олган балини пасайтиришга йўл қўйилмайди.

92. Апелляция комиссияси апелляция шикояти билан мурожаат қилган номзодга ўз қарорини у қабул қилинган куннинг ўзида маълум қилиши керак.

93. Апелляция комиссиясининг психологик ўрганиш, тест синови, полиграф текширув ва жисмоний тайёргарлик даражасини баҳолаш натижаларига ўзгартириш киритиш ва номзодни Ушбу танлов тадбирларини муваффақиятли топширган деб топиш тўғрисидаги қарори асосида у кейинги босқичга ўтказиш учун тавсия этилади.

94. Апелляция комиссияси қарори устидан номзод юқори турувчи органга ёки судга шикоят қилиши мумкин.

11-БОБ. ЯКУНИЙ ҚОИДА

95. Мазкур Йўриқнома талабларининг бузилишида айбдор бўлган шахслар қонунчилик ҳужжатларига мувофиқ жавоб беради.

Йўриқномага

1-ИЛОВА

Ички ишлар органларига хизматга

танловларсиз қабул қилинадиган тор ихтисослик

бўйича мутахассисликлар ва лавозимлар

РЎЙХАТИ

         

          

      

Йўриқномага

2-ИЛОВА

Ички ишлар органларига хизматга

қабул қилиш учун алоҳида мутахассислик

талаб этиладиган лавозимлар

РЎЙХАТИ*

           

          

*) Изоҳлар:

1. Ушбу рўйхатдаги айрим лавозимлар мазкур Йўриқноманинг 1-иловасига мувофиқ Ички ишлар органларига хизматга танловларсиз қабул қилинадиган тор ихтисослик бўйича мутахассисликлар ва лавозимлар рўйхатига киритилганлиги боис, ушбу лавозимлар учун номзодлар хизматга танловларсиз қабул қилинади;

2. Ўзбекистон Республикаси Президентининг 2021 йил 29 ноябрдаги ПФ-27-сон "Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида"ги Фармонига асосан 2024 йил 1 сентябрдан эътиборан Тошкент шаҳар ички ишлар органлари, 2025 йил 1 сентябрдан бошлаб қолган ҳудудий ички ишлар органлари профилактика катта инспектори лавозимларига фақат олий юридик маълумотга эга бўлган ходимлар тайинланади.

         

          

Йўриқномага

3-ИЛОВА

Ички ишлар органларининг ўттиз

ёшдан катта фуқаролар қабул қилиниши мумкин

бўлган бўлинмалари ва лавозимлари

РЎЙХАТИ

         

1. Ахборот технологиялари, алоқа ва ахборотни ҳимоялаш, ривожлантириш ҳамда компьютерлаштирилган ва киберхавфсизлик бўлинмалари бўйича:

Бошқарма, марказ бошлиғи ва ўринбосарлари;

бўлим ва бўлинма бошлиғи ва ўринбосарлари;

бош ва етакчи мутахассис;

катта мутахассис-муҳандис;

катта муҳандис;

катта инспектор;

муҳим топшириқлар бўйича инспектор;

мутахассис, муҳандис, кичик мутахассис;

ўта муҳим ишлар бўйича тезкор вакил;

катта тезкор вакил.

2. Назорат-тафтиш инспекцияси бўйича:

инспекция бошлиғи;

инспекция бошлиғи ўринбосари;

бўлим бошлиғи;

бош ва катта тафтишчи;

тафтишчи.

3. Молия ва моддий-техника таъминоти хизматлари бўйича:

бошқарма бошлиқлари;

бошқарма бошлиғи ўринбосари;

бўлим, бўлинма бошлиғи;

бош иқтисодчи;

бош муҳандис-иқтисодчи;

бош ва етакчи мутахассис;

бош муҳандис;

бош бухгалтер, бухгалтер;

ғазначи;

иқтисодчи.

4. Капитал қурилиш ва таъмирлаш хизматлари бўйича:

бошқарма бошлиғи;

бошқарма бошлиғи ўринбосари;

бўлим ва бўлинма бошлиғи;

бош мутахассис.

5. Хўжалик хизматлари ҳамда жазони ижро этиш муассасалари ва ташкилотлари бўйича:

департамент бошлиғининг ишлаб чиқаришни ривожлантириш бўйича ўринбосари;

ишлаб чиқаришни ташкил этиш бошқармаси бошлиғи;

бошқарма бошлиғи ўринбосари - ишлаб чиқариш ва қишлоқ хўжалиги бўлими бошлиғи;

корхона директори - колония бошлиғининг ишлаб чиқаришни ривожлантириш бўйича ўринбосари;

транспорт бўлими бошлиғи;

бош муҳаррир;

етакчи ва катта мутахассис;

етакчи мутахассис-муҳаррир;

катта мутахассис-мухбир;

катта мутахассис-масъул котиб;

мутахассис-мухбир;

бош ва катта муҳандис;

катта муҳандис-энергетик;

катта муҳандис-иқтисодчи;

катта мутахассис-зоотехник;

участка бошлиғи;

мутахассис;

цех бошлиғи;

катта инспектор-муҳандис;

инспектор-муҳандис.

6. Жамоатчилик ва оммавий ахборот воситалари билан алоқалар бўлинмалари бўйича:

бошқарма бошлиғи;

бошқарма бошлиғининг ўринбосари;

бўлим, марказ, бўлинма ва хизмат бошлиғи;

матбуот котиби;

бош мутахассис;

бош муҳаррир;

бош режиссёр;

бош продюсер;

бош инспектор;

етакчи ва катта мутахассис;

муҳаррир;

муҳаррир ўринбосари;

муҳим топшириқлар бўйича инспектор;

мутахассис-мухбир;

мухбир ва оператор;

оператор;

кичик инспектор;

мутахассис.

7. Таълим муассасалари бўйича:

таълим муассасаси бошлиғи (директори);

(катта) илмий ходимлар;

кафедра бошлиғи ва ўринбосари;

факультет бошлиғи ва ўринбосари;

цикл ва марказ бошлиғи;

профессор;

доцент;

катта ўқитувчи;

ўқитувчи;

кабинет бошлиғи.

8. Тиббиёт хизматлари бўйича:

бошқарма, бўлим, стоматологик поликлиника, лаборатория, госпиталь, санаторий, (бош) марказ, касалхона бошлиқлари;

бошқарма, бўлим, стоматологик поликлиника, лаборатория, госпиталь, санаторий, (бош) марказ, касалхона бошлиқларининг ўринбосарлари;

ҳарбий тиббий комиссия раиси;

бош шифокор (ўринбосари), фармацевт-провизор, дорихона бошлиғи, тиббий омборхона бошлиғи, амбулатория бошлиғи, фармацевт ассистенти, лаборант, тиббий рўйхатчи, фельдшер, тиббий ҳамшира, шифокор-эпидемиолог ёрдамчиси, санитария шифокори ёрдамчиси.

9. Юридик хизмат бўйича:

бошқарма, бўлим, бўлинма бошлиғи;

бошқарма бошлиғи ўринбосари;

бош, етакчи, катта юрисконсульт ҳамда юрисконсульт;

муҳим топшириқлар бўйича инспектор.

10. Кинология хизмати бўйича:

бўлим ва бўлинма бошлиғи;

лаборатория бошлиғи;

ветеринария хизмати бошлиғи;

ўқитувчи;

ветеринар-шифокор;

хизмат итларини амалиётда қўллаш бўйича илмий ходим;

кичик инструктор-кинолог;

кичик инспектор-кинолог;

кинолог, фельдшер, лаборант, ветеринар-фельдшер, ветеринар;

отлиқ отряд ветеринар-шифокори, ветеринар-фельдшер.

11. Маданият саройи ва оркестр бўйича:

маданият саройи бошлиғи-бадиий раҳбар;

маданият саройи бошлиғининг ўринбосари-қўшиқ ва рақс ансамбль бошлиғи;

ансамбль бошлиғи ўринбосари;

ансамбль бошлиғининг ёрдамчиси;

олий, биринчи, иккинчи ва учинчи тоифали артист;

оркестр бошлиғи - бош дирижёр;

оркестр бошлиғининг ўринбосари - дирижёр;

оркестр бошлиғининг тарбиявий ишлар бўйича ўринбосари;

оркестр бошлиғининг ёрдамчиси;

концертмейстер;

(катта) мусиқачи.

12. Халқаро ҳамкорлик бўлинмалари бўйича:

бошқарма бошлиғи;

бошқарма бошлиғининг ўринбосари;

бўлим ва бўлинма бошлиғи;

бош инспектор;

муҳим топшириқлар бўйича инспектор.

13. Хавфсиз туризм бўлинмалари бўйича:

бошқарма бошлиғи;

бошқарма бошлиғининг ўринбосари;

бўлим ва бўлинма бошлиғи;

бош ва муҳим топшириқлар бўйича инспектор;

марказ бошлиғи;

катта мутахассис;

катта инспектор-навбатчи;

ЙПХ (катта) инспектори;

(катта) инспектор.

14. Миграция ва фуқароликни расмийлаштириш бўлинмаларининг электрон ахборот тизимлари ва ахборот хавфсизлиги йўналиши бўйича:

бошқарма бошлиғи;

бўлим (бўлинма, гуруҳ) бошлиғи;

бош ва катта инспектор;

муҳим топшириқлар бўйича инспектор;

инспектор.

15. Психологик таъминлаш бўлинмалари бўйича:

бўлим (бўлинма) бошлиғи;

бош психолог;

етакчи мутахассис-психолог;

етакчи мутахассис-психолог-полиграфолог;

катта психолог;

катта психолог-полиграфолог;

психолог;

криминалист-психолог.

16. Тергов хизмати бўлинмалари бўйича:

департамент бошлиғи;

департамент бошлиғининг биринчи ўринбосари, ўринбосарлари;

бошқарма бошлиқлари ва ўринбосарлари;

бўлим (бўлинма) бошлиғи ва ўринбосарлари;

ўта муҳим ишлар бўйича терговчи;

катта терговчи;

терговчи;

катта суриштирувчи;

суриштирувчи.

17. Ҳуқуқбузарликлар профилактикаси хизмати бўлинмалари бўйича:

Катта инспектор психолог;

Инспектор психолог.

18. Йўл ҳаракати хавфсизлиги бўлинмалари бўйича:

бошқарма бошлиғи;

бошқарма бошлиғи ўринбосари;

бўлим, бўлинма бошлиғи;

бригада, батальон, дивизион командири ва ўринбосарлари;

йўл-патруль хизмати (катта) инспектори;

муҳим топшириқлар бўйича инспектор;

катта инспектор, инспектор.

19. Эксперт-криминалистика бўлинмалари бўйича:

марказ бошлиғи, ўринбосари,

бўлим, бўлинма бошлиғи,

бош эксперт, катта эксперт, эксперт.

20. Махсус операцияларни мувофиқлаштириш бошқармаси, Махсус тайёргарлик ўқув маркази ва Тошкент метрополитени бўйича махсус отряд бўйича:

моделлаштириш ва симуляция бўйича бош мутахассис;

алоқа воситалари ва ахборот-коммуникация технологиялари бўйича бош мутахассис; қидирув асбоб-ускуналари, радиоэлектрон ҳимоя қилиш воситалари ва робототехника бўйича бош мутахассис;

радиоэлектрон қурилмалар бўйича бош мутахассис;

портловчи, кимёвий ва заҳарловчи моддалар бўйича бош мутахассис.

радиацион ва кимёвий хавфсизлик бўйича гуруҳ бош мутахассиси.

21. Тезкор-қидирув департаментининг тезкор-техник ишлов бўлинмалари бўйича:

Мутахассис (бош, етакчи, катта).

22. Терроризм ва экстремизмга қарши курашиш бўлинмаларининг Мафкуравий тарғибот йўналиши бўйича:

Мутахассис (бош, етакчи, катта).

23. Пробация хизматининг Ягона электрон мониторинг маркази бўйича:

Марказ бошлиғи, етакчи мутахассис-оператори, катта мутахассис-оператор, кичик мутахассис.

24. Йўл ҳаракати хавфсизлиги хизматининг Йўл инфратузилмасини назорат қилиш бўлинмалари бўйича:

бошқарма бошлиғи, бўлим (бўлинма) бошлиғи, етакчи муҳандис, катта муҳандис, муҳандис, етакчи мутахассис, катта мутахассис, муҳим топшириқлар бўйича инспектор, катта инспектор, инспектор.

Йўриқномага

4-ИЛОВА

Ички ишлар органларига хизматга қабул

қилишда алоҳида антропометрик параметрлар

белгиланадиган бўлинмалар ва лавозимлар

РЎЙХАТИ

        

1. Бўйининг баландлиги 175 см. дан паст бўлмаган эркаклар ва 170 см. дан паст бўлмаган аёллар қабул қилинадиган лавозимлар:

Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати бўлинмаларининг йўл-патруль хизмати сафарбарлик гуруҳи командирлари;

йўл-патруль хизмати (катта) инспекторлари.

2. Бўйининг баландлиги 170 см. дан паст бўлмаган эркаклар ва 165 см. дан паст бўлмаган аёллар қабул қилинадиган лавозимлар:

а) Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати бўлинмаларининг ушбу Рўйхатнинг 1-бандида кўрсатилган лавозимлардан ташқари барча лавозимлари;

б) Ўзбекистон Республикаси Ички ишлар вазирлиги Жамоат хавфсизлиги департаменти Жамоат тартибини сақлаш бўлинмаларининг:

бригада, батальон ва отряд командирлари ҳамда уларнинг хизмат бўйича ўринбосарлари;

гуруҳ командирлари;

ҳайдовчи-ходимлар (бундан навбатчилик қисмлари ва таъминлаш бўлинмалари ҳайдовчи-ходимлари мустасно);

сафдор ходимлар;

отлиқ ходимлар;

ижтимоий-сиёсий, оммавий-маданий тадбирларни ўтказишда хавфсизликни таъминлаш батальони ва отрядларнинг барча лавозимлари.

Йўриқномага

5-ИЛОВА

Ички ишлар органларидаги хизматга номзодларни

танлаб олиш тадбирларини ташкил этиш ва ўтказиш

бўйича қабул комиссиясининг намунавий

ТАРКИБИ

            

Йўриқномага

6-ИЛОВА

Психологик тест натижаларини ҳисоблаш

МЕЗОНЛАРИ

          

         

*) Изоҳ. Жадвалда кўрсатилган вазифаларнинг (тегишли шкалалар билан бирга) ҳар бири бўйича ички ишлар органларида хизматга тавсия этиш учун зарур бўлган натижани қайд этган номзодларгина хизматга тавсия этилади. Бунда, вазифаларнинг (тегишли шкалалар билан бирга) ақалли биттаси бўйича қониқарсиз натижа қайд этган номзод хизматга тавсия этилмайди.

Йўриқномага

7-ИЛОВА

Психологик тест синовлари натижалари бўйича

ҚАЙДНОМА

         

20____ йил "_____" _____________

     

           

Йўриқномага

8-ИЛОВА

Тест синови натижалари бўйича

ҚАЙДНОМА

         

            

            

           

             

           

Йўриқномага

9-ИЛОВА

Номзодларнинг жисмоний тайёргарлик даражасини

БАҲОЛАШ МЕЗОНЛАРИ

          

1. Эркак жинсидаги номзодлар учун:

          

       

2. Аёл жинсидаги номзодлар учун:

          

            

3. Жисмоний тайёргарлик бўйича синовларини учта машқини бажарган эркак ва аёл жинсидаги номзодларнинг умумий баҳоси қуйидагича аниқланади:

         

Йўриқномага

10-ИЛОВА

Номзодларнинг жисмоний тайёргарлик

даражаси натижалари бўйича

ҚАЙДНОМА

         

20___ йил "____" ____________.

1. Эркак жинсидаги номзодлар учун:

        

    

      

2. Аёл жинсидаги номзодлар учун:

         

           

      

Йўриқномага

11-ИЛОВА

          

         

АРИЗА

          

Сиздан, ички ишлар органлари хизматига қабул қилинишим учун ҳужжатларимни расмийлаштиришга рухсат беришингизни сўрайман.

Хизмат заруриятига кўра лозим топилган ҳудудда хизмат қилишга тайёрман. Хизмат бўйича менга маълум бўлган давлат, ҳарбий ва хизматга оид маълумотларни сир сақлашга ваъда бераман.

        

         

Йўриқномага

12-ИЛОВА

МАЪЛУМОТНОМА

          

          

           

Қонун ҳужжатлари маълумотлари миллий базаси (www.lex.uz),

2023 йил 7 декабрь