Ўзбекистон Республикаси Вазирлар Маҳкамасининг 06.03.2024 й. 115-сон "Кимёлаштириш ва ўсимликларни ҳимоя қилиш воситаларини синовдан ўтказиш ҳамда рўйхатга олиш тартиби тўғрисидаги низомни тасдиқлаш ҳақида"ги Қарори

Функция недоступна

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

06.03.2024 й.

N 115

КИМЁЛАШТИРИШ ВА ЎСИМЛИКЛАРНИ

ҲИМОЯ ҚИЛИШ ВОСИТАЛАРИНИ СИНОВДАН

ЎТКАЗИШ ҲАМДА РЎЙХАТГА ОЛИШ

ТАРТИБИ ТЎҒРИСИДАГИ НИЗОМНИ

ТАСДИҚЛАШ ҲАҚИДА

Сўнгги йилларда Ўзбекистон Республикаси ҳудудига пестицидларни олиб киришни тартибга солиш, жумладан, қишлоқ хўжалигида қўлланиладиган кимёлаштириш ва ўсимликларни ҳимоя қилиш воситаларини синовдан ўтказиш ҳамда рўйхатга олишни такомиллаштириш борасида тизимли чора-тадбирлар амалга оширилмоқда.

Шу билан бирга, пестицидларни қўллаш устидан давлат назоратини ўрнатиш бўйича қонунчилик ҳужжатларини такомиллаштириш, миллий қонунчиликни Пестицидларни тарқатиш ва улардан фойдаланиш бўйича халқаро ахлоқ кодекси талабларига мувофиқлаштириш зарурати мавжуд.

Ўзбекистон Республикасининг "Ўсимликларни ҳимоя қилиш тўғрисида"ги Қонуни ҳамда Ўзбекистон Республикаси Президентининг "Экология, атроф-муҳитни муҳофаза қилиш ва иқлим ўзгариши вазирлиги фаолиятини самарали ташкил этиш чора-тадбирлари тўғрисида" 2023 йил 31 майдаги ПҚ-171-сон қарорига мувофиқ, шунингдек, кимёлаштириш ва ўсимликларни ҳимоя қилиш воситаларини синовдан ўтказиш ва рўйхатга олиш тартибини янада такомиллаштириш мақсадида Вазирлар Маҳкамаси ҚАРОР ҚИЛАДИ:

1. Қуйидагиларни назарда тутувчи Кимёлаштириш ва ўсимликларни ҳимоя қилиш воситаларини синовдан ўтказиш ҳамда рўйхатга олиш тартиби тўғрисидаги низом 1-иловага мувофиқ тасдиқлансин:

кимёлаштириш ва ўсимликларни ҳимоя қилиш воситаларини синовдан ўтказиш ҳамда рўйхатга олиш учун ариза бериш тартиби;

кимёлаштириш ва ўсимликларни ҳимоя қилиш воситаларини синовдан ўтказиш тартиби;

кимёлаштириш ва ўсимликларни ҳимоя қилиш воситаларини рўйхатга олиш тартиби;

ҳисоботларни тақдим қилиш ва кўриб чиқиш, шунингдек, кимёлаштириш ва ўсимликларни ҳимоя қилиш воситалари рўйхатга олинганлиги тўғрисидаги гувоҳномани бериш ёки уни беришни рад этиш;

кимёлаштириш ва ўсимликларни ҳимоя қилиш воситалари рўйхатга олинганлиги тўғрисидаги гувоҳномани расмийлаштириш;

кимёлаштириш ва ўсимликларни ҳимоя қилиш воситалари рўйхатга олинганлиги тўғрисидаги гувоҳномани қайта расмийлаштириш;

кимёлаштириш ва ўсимликларни ҳимоя қилиш воситаларини қайта рўйхатга олиш;

кимёлаштириш ва ўсимликларни ҳимоя қилиш воситалари рўйхатга олинганлиги тўғрисидаги гувоҳноманинг амал қилишини тугатиш;

кимёлаштириш ва ўсимликларни ҳимоя қилиш воситаларини рўйхатга олувчиларнинг ҳуқуқ ва мажбуриятлари.

2. Ўзбекистон Республикаси Ҳукуматининг 2-иловага мувофиқ айрим қарорларига ўзгартириш ва қўшимчалар киритилсин.

3. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.

4. Мазкур қарор расмий эълон қилинган кундан бошлаб уч ойдан кейин кучга киради.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.

Ўзбекистон Республикасининг Бош вазири                                А. Арипов

Вазирлар Маҳкамасининг

2024 йил 6 мартдаги

115-сон қарорига

2-ИЛОВА

Ўзбекистон Республикаси Ҳукуматининг айрим

қарорларига киритилаётган ўзгартиришлар

1. Вазирлар Маҳкамасининг 2020 йил 18 ноябрдаги 729-сон қарори билан тасдиқланган Органик ва органик-минерал ўғитлар хавфсизлиги тўғрисидаги умумий техник регламентда:

129-банд қуйидаги таҳрирда баён этилсин:

"129. Органик ва органик-минерал ўғитлар Ўзбекистон Республикаси Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги томонидан рўйхатга олинади.

Кимёлаштириш ва ўсимликларни ҳимоя қилиш воситаларини синовдан ўтказиш ва рўйхатга олиш тартиби тўғрисидаги низомга 2-иловада келтирилган шаклга мувофиқ органик ва органик-минерал ўғитларга рўйхатга олганлик тўғрисида гувоҳнома берилади";

136 ва 137-бандлар қуйидаги таҳрирда баён этилсин:

"136. Техник регламент талабларига риоя қилиш устидан давлат назоратини Ўзбекистон Республикаси Қишлоқ хўжалиги вазирлиги, Соғлиқни сақлаш вазирлиги, Ветеринария ва чорвачиликни ривожлантириш давлат қўмитаси, Ўсимликлар карантини ва ҳимояси агентлиги, шунингдек, бошқа махсус ваколатли давлат органлари ўз ваколатлари доирасида амалга оширади.

137. Техник регламент талабларига риоя қилиш устидан давлат назоратини амалга оширувчи органларнинг қароридан норози бўлган тадбиркорлик субъектлари Ўзбекистон Республикаси Қишлоқ хўжалиги вазирлиги, Соғлиқни сақлаш вазирлиги, Ветеринария ва чорвачиликни ривожлантириш қўмитаси, Ўсимликлар карантини ва ҳимояси агентлиги, шунингдек, бошқа махсус ваколатли давлат органларининг мансабдор шахслари ҳаракати (ҳаракатсизлиги) устидан белгиланган тартибда юқори турувчи органга ёки судга шикоят қилиш ҳуқуқига эга";

6-илова чиқариб ташлансин.

2. Вазирлар Маҳкамасининг 2022 йил 1 мартдаги 91-сон қарори билан тасдиқланган Минерал ўғитлар хавфсизлиги тўғрисидаги умумий техник регламентда:

42-банднинг олтинчи хатбошиси қуйидаги таҳрирда баён этилсин:

"минерал ўғитни Ўзбекистон Республикаси бозорида муомалага чиқариш учун рухсат берилган минерал ўғитларнинг ягона реестрига киритади ҳамда Кимёлаштириш ва ўсимликларни ҳимоя қилиш воситаларини синовдан ўтказиш ва рўйхатга олиш тартиби тўғрисидаги низомга 2-иловага мувофиқ шаклда минерал ўғит рўйхатга олинганлиги тўғрисида гувоҳнома беради";

48-банд қуйидаги таҳрирда баён этилсин:

"48. Техник регламент талабларига амал қилиш бўйича давлат назорати Ўзбекистон Республикаси Қишлоқ хўжалиги вазирлиги ҳузуридаги Агросаноат мажмуи устидан назорат қилиш инспекцияси, Фавқулодда вазиятлар вазирлиги, Соғлиқни сақлаш вазирлиги, Тоғ-кон, геология ва саноат хавфсизлигини назорат қилиш инспекцияси, Экология, атроф-муҳитни муҳофаза қилиш ва иқлим ўзгариши вазирлиги, Ўсимликлар карантини ва ҳимояси агентлиги, Инвестициялар, саноат ва савдо вазирлиги ҳузуридаги Ўзбекистон техник жиҳатдан тартибга солиш агентлиги, шунингдек, бошқа ваколатли давлат органлари томонидан ўз ваколатлари доирасида амалга оширилади";

50-банддаги "Ваколатли давлат органлари Техник регламент" сўзлари "Техник регламент талабларига риоя қилиш устидан давлат назоратини амалга оширувчи органларнинг" сўзлари билан алмаштирилсин;

3-илова чиқариб ташлансин.

Вазирлар Маҳкамасининг

2024 йил 6 мартдаги

115-сон қарорига

3-ИЛОВА

Ўзбекистон Республикаси Ҳукуматининг

ўз кучини йўқотган деб эътироф

этилаётган айрим қарорлари

РЎЙХАТИ

1. Вазирлар Маҳкамасининг "Кимёлаштириш ва ўсимликларни ҳимоя қилиш воситаларини республика ҳудудига олиб кириш тартибини соддалаштириш тўғрисида" 2020 йил 2 декабрдаги 765-сон қарори.

2. Вазирлар Маҳкамасининг "Ўзбекистон Республикасида ўсимликлар карантини ва ҳимояси тизимини тубдан такомиллаштирилганлиги муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида" 2021 йил 15 декабрдаги 752-сон қарорига 1-илованинг 33-банди.

3. Вазирлар Маҳкамасининг "Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикасининг "Норматив-ҳуқуқий ҳужжатлар тўғрисида" 2021 йил 20 апрелдаги ЎРҚ-682-сон Қонуни)" 2022 йил 4 апрелдаги 153-сон қарорига илованинг 955-банди.

Қонун ҳужжатлари маълумотлари миллий базаси (www.lex.uz),

2024 йил 7 март