Ўзбекистон Республикаси Президентининг 28.05.2024 й. ПФ-83-сон "Ўзбекистон Республикаси Президентининг айрим ҳужжатларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида"ги Фармони

Функция недоступна

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ФАРМОНИ

28.05.2024 й.

N ПФ-83

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ АЙРИМ ҲУЖЖАТЛАРИГА

ЎЗГАРТИРИШ ВА ҚЎШИМЧАЛАР КИРИТИШ,

ШУНИНГДЕК, БАЪЗИЛАРИНИ ЎЗ КУЧИНИ

ЙЎҚОТГАН ДЕБ ҲИСОБЛАШ ТЎҒРИСИДА

Ўзбекистон Республикаси Президентининг 2023 йил 3 ноябрдаги "Футбол-таълим муассасалари тармоғини кенгайтириш ҳамда халқаро стандартларга мос келадиган футбол инфратузилмасини ривожлантириш чора-тадбирлари тўғрисида"ги ПҚ-355-сон қарорига мувофиқ, шунингдек мамлакатимизда камондан отиш спорт турини янада ривожлантириш, мазкур спорт тури бўйича ўтказиладиган "Алпомиш ва Барчиной" ҳамда аёллар ўртасида "Тўмарис кубоги" халқаро турнирлари нуфузини янада ошириш ва қамровини кенгайтириш мақсадида:

1. Ўзбекистон Республикаси Президентининг айрим ҳужжатларига 1-иловага мувофиқ қуйидагиларни назарда тутувчи ўзгартириш ва қўшимчалар киритилсин:

Футбол бўйича мутахассисларни тайёрлаш маркази негизида Футбол мутахассисларини тайёрлаш ва илмий-тадқиқот марказини ташкил этиш;

Республика болалар ва ўсмирлар футбол академиясини Республика футбол академияси этиб қайта номлаш ҳамда уни Ўзбекистон футбол ассоциацияси тизимида ташкил этилаётган Миллий футбол маркази тузилмасига ўтказиш;

камондан отиш спорт тури бўйича "Алпомиш ва Барчиной" ҳамда аёллар ўртасида "Тўмарис кубоги" турнирларини ҳар уч йилда республиканинг барча ҳудудларида ўтказиб бориш тизимини йўлга қўйиш;

"Алпомиш ва Барчиной" ҳамда "Тўмарис кубоги" халқаро турнирларини Спорт ва оммавий жисмоний тарбия тадбирларининг календарь режасида назарда тутилган маблағлар ҳисобидан ташкил этиш ва ўтказиш.

2. Ўзбекистон Республикаси Президентининг айрим ҳужжатлари 2-иловага мувофиқ ўз кучини йўқотган деб ҳисоблансин.

3. Мазкур Фармоннинг ижросини назорат қилиш Ўзбекистон Республикаси Бош вазири А.Н. Арипов зиммасига юклансин.

Ўзбекистон Республикаси Президенти                                         Ш. Мирзиёев

Ўзбекистон Республикаси

Президентининг

2024 йил 28 майдаги

ПФ-83-сон Фармонига

1-ИЛОВА

Ўзбекистон Республикаси Президенти

айрим ҳужжатларига киритилаётган

ўзгартириш ва қўшимчалар

        

1. Ўзбекистон Республикаси Президентининг 2019 йил 4 декабрдаги "Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида"ги ПФ-5887-сон Фармонида:

а) 2-банднинг бешинчи хатбошисидаги "Ёшлар сиёсати ва спорт вазирлиги" сўзлари "Спорт вазирлиги" сўзлари билан алмаштирилсин;

б) 7-банднинг "г" кичик бандидаги "Республика болалар ва ўсмирлар футбол академиясида" сўзлари "Республика футбол академиясида" сўзлари билан алмаштирилсин;

в) 2-илованинг 3-боби ўн олтинчи ва ўттизинчи хатбошиларидаги "Ёшлар сиёсати ва спорт вазирлиги" сўзлари "Спорт вазирлиги" сўзлари билан алмаштирилсин;

г) 3-илованинг 23, 30, 36, 50 ва 52-позициялари "Масъул ижрочилар" устунидаги "Ёшлар сиёсати ва спорт вазирлиги" сўзлари "Спорт вазирлиги" сўзлари билан алмаштирилсин;

д) 4-илованинг 1-32-позициялари "Масъул ижрочилар" устунидаги "Ёшлар сиёсати ва спорт вазирлиги" сўзлари "Спорт вазирлиги" сўзлари билан алмаштирилсин.

2. Ўзбекистон Республикаси Президентининг 2021 йил 17 июндаги "Камондан отиш спорт турини янада ривожлантириш ва оммалаштириш чора-тадбирлари тўғрисида"ги ПҚ-5149-сон қарорининг 4-банди қуйидаги таҳрирда баён этилсин:

"4. Спорт вазирлиги ҳамда Ўзбекистон камондан отиш федерациясининг 2025 йилдан бошлаб:

ҳар уч йилда бир марта анъанавий тарзда камондан отиш спорт тури бўйича "Алпомиш ва Барчиной" ҳамда аёллар ўртасида "Тўмарис кубоги" халқаро турнирларини ташкил этиш;

мамлакатимиз туристик салоҳиятини янада кенг намоён этиш ҳамда ушбу спорт турининг оммавийлигини ошириш мақсадида ҳар йили Бухоро, Қўқон, Самарқанд ва Хива шаҳарларида "Туризм ва камондан отиш ҳафталиги"ни ташкил этиш ва унинг доирасида сайёҳларни жалб қилган ҳолда камондан отиш бўйича спортчилар ва сайёҳлар ўртасида турнирлар, маҳорат дарслари ҳамда учрашувлар, туристик салоҳиятни оширишга хизмат қилувчи сайиллар ўтказиш;

"Алпомиш ва Барчиной" ҳамда "Тўмарис кубоги" халқаро турнирларини Спорт ва оммавий жисмоний тарбия тадбирларининг календарь режасида назарда тутилган маблағлар ҳисобидан молиялаштириш тўғрисидаги таклифларига розилик берилсин.

Спорт вазирлиги, Ўзбекистон камондан отиш федерацияси, Ўзбекистон Миллий олимпия қўмитаси:

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда 2024 йил 1 июлга қадар ушбу бандда назарда тутилган халқаро турнирларга пухта тайёргарлик кўриш ва уларни юқори савияда ўтказиш бўйича режа-жадвални тасдиқласин;

халқаро турнирларда маҳаллий камончилар билан биргаликда юқори рейтингга эга бўлган жаҳоннинг кучли камончилари, тренерлар ва ҳакамларнинг иштирокини таъминласин.".

3. Ўзбекистон Республикаси Президентининг 2022 йил 6 июндаги "Давлат спорт-таълим муассасалари фаолиятини мутлақо янги тизим асосида ташкил қилиш чора-тадбирлари тўғрисида"ги ПҚ-268-сон қарорида:

а) 2-банднинг учинчи хатбошисидаги "миллий кураш" сўзлари "миллий спорт турлари" сўзлари билан алмаштирилсин;

б) 3-бандда:

"г" кичик банддаги "бундан миллий кураш ҳамда алоҳида Ҳукумат қарорлари билан белгиланган спорт турлари мустасно" сўзлари "бундан миллий спорт турлари ҳамда алоҳида Ўзбекистон Республикаси Президенти ҳужжатлари ва Ҳукумат қарорлари билан белгиланган спорт турлари мустасно" сўзлари билан алмаштирилсин;

"д" кичик банддаги "миллий кураш ҳамда алоҳида Ҳукумат қарорлари билан белгиланган спорт турлари бундан мустасно" сўзлари "бундан миллий спорт турлари ҳамда алоҳида Ўзбекистон Республикаси Президенти ҳужжатлари ва Ҳукумат қарорлари билан белгиланган спорт турлари мустасно" сўзлари билан алмаштирилсин;

в) 4-илованинг биринчи бўлимидаги "миллий кураш" сўзлари "миллий спорт турлари" сўзлари билан алмаштирилсин.

4. Ўзбекистон Республикаси Президентининг 2023 йил 7 апрелдаги "Оммавий ва профессионал футболни ҳар томонлама ривожлантиришнинг қўшимча чора-тадбирлари тўғрисида"ги ПҚ-115-сон қарорида:

а) 11-банднинг тўртинчи хатбошиси чиқариб ташлансин;

б) 26-банднинг иккинчи хатбошисидаги "2023-2024 йилларда" сўзлари "2024-2025 йилларда" сўзлари билан алмаштирилсин;

в) 1-илованинг 12-позицияси "Амалга ошириш муддати" устунидаги "2023" рақами "2025" рақами билан алмаштирилсин.

5. Ўзбекистон Республикаси Президентининг 2023 йил 28 июлдаги "Маҳаллаларда спорт инфратузилмасини ривожлантириш ва спорт майдончаларидан самарали фойдаланишни ташкил этиш чора-тадбирлари тўғрисида"ги ПҚ-245-сон қарорининг 3-банди қуйидаги таҳрирдаги баён этилсин:

"3. Белгилансинки:

а) спорт майдончаларини қуриш "Беш ташаббус олимпиадаси" доирасидаги спорт мусобақаларининг республика босқичида ғолиб ва совриндор бўлган ҳамда ҳудудида спорт инфратузилмаси мавжуд бўлмаган маҳаллаларда (кейинги ўринларда - спорт инфратузилмаси мавжуд бўлмаган маҳаллалар) амалга оширилади;

б) Сурхондарё вилоятида спорт иншоотларини давлат-хусусий шериклик шартларида барпо этиш лойиҳалари тадбиркорлик субъектининг тўлиқ ўз маблағлари ҳисобидан молиялаштирилган ҳолларда қурилган бино ва иншоотларнинг (бундан ер майдони, бино ва иншоотларнинг умумий фойдаланишга мўлжалланган коммуникация тармоқлари эгаллаган қисми мустасно) 20 фоизидан ошмаган қисми қонунчиликда тақиқланмаган тадбиркорлик фаолияти билан шуғулланиш учун маҳаллий хусусий шерикка мулк ҳуқуқи асосида ўтказилади;

в) спорт инфратузилмаси мавжуд бўлмаган маҳаллаларда спорт майдончаларини қуриш ишларини амалга ошириш доирасида:

Ички ишлар вазирлиги ҳузуридаги Жазони ижро этиш департаменти - буюртмачи;

Ички ишлар вазирлиги ҳузуридаги Жазони ижро этиш департаменти 13-сон Жазони ижро этиш муассасаси - бош пудратчи ҳисобланади.

Бунда, ушбу бандда назарда тутилган тадбирларни молиялаштириш билан боғлиқ харажатлар Спорт вазирлиги маблағлари ҳисобидан амалга оширилади.".

         

       

Ўзбекистон Республикаси

Президентининг

2024 йил 28 майдаги

ПФ-83-сон Фармонига

2-ИЛОВА

Ўзбекистон Республикаси

Президентининг ўз кучини йўқотган деб

эътироф этилаётган айрим ҳужжатлари

РЎЙХАТИ

1. Ўзбекистон Республикаси Президентининг 2019 йил 4 декабрдаги "Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида"ги ПФ-5887-сон Фармонининг 6-банди ҳамда 5-иловаси.

2. Ўзбекистон Республикаси Президентининг 2023 йил 12 июндаги "Ёшлар сиёсати ва спорт вазирлиги ташкил қилинганлиги муносабати билан Ўзбекистон Республикаси Президентининг айрим ҳужжатларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида"ги ПФ-92-сон Фармонига 1-илованинг 7-банди "к" кичик банди.

3. Ўзбекистон Республикаси Президентининг 2006 йил 1 майдаги "Ўзбекистонда футболни ривожлантиришга доир қўшимча чора-тадбирлар тўғрисида"ги ПҚ-338-сон қарори.

      

        

Қонун ҳужжатлари маълумотлари миллий базаси (www.lex.uz),

2024 йил 29 май